Rural Development Minister-in Watershed Mahotsav a hawng

Hnahthial Post | November 14, 2025, Aizawl: Vawiin khan Prof. Lalnilawma, Minister, Rural Development & Administration Department chuan a Office Chamber-ah Watershed hmalakna kawnga sawrkar leh mipuite thawhhona chak lehzuala kalpuina tur, Watershed Mahotsav a hawng.

Minister Prof. Lalnilawma chuan tuihna humhalh tulzia sawiin, he Watershed Mahotsav denchhen hian Project Area-a mipuite tuihna kawnga theihtawp chhuah turin a sawm a. Tuihna humhalh pawimawhna pholanna tur reels insiamsiakah pawh thalai leh a thiam apiangte tel turin a sawm bawk.

Minister chuan National Conference on Watershed Development Component - Pradhan Mantri Krishi Sinchayee Yojana (WDC-PMKSY), Guntur, Andhra Pradesh-a neih zawh takah Mizoram chu PMKSY 2.0 hnuaia India rama project cost atanga sum hmang tha/chak ber (Best Performance State in Expenditure)-ah thlan a ni tih leh financial year kal meka PMKSY 2.0 project cost chu Rs. 25.53 crore niin, 1st & 2nd Instalment Rs 6.38 leh Rs. 12.76 crore dawn tawh a ni tih leh 3rd Instalment Rs. 6.39 crore dil leh mek a ni tih a sawi bawk a ni.

He Watershed Mahotsav hawnna inkhawm hi Pu K. Lalrohlua, Director, Rural Development chuan kaihruaiin, Pi PC Zonuntluangi, Jt. Director, Rural Development-in lawmthu sawiin hun a khar a ni.

Watershed Mahotsav hi ram pum huapa hmalakna niin, November ni 11, 2025 khan Shri Shivraj Singh Chouhan, Hon’ble Minister, Rural Development Department, Govt. of India chuan National Conference on Watershed Development Component - Pradhan Mantri Krishi Sinchayee Yojana (WDC-PMKSY), Guntur-a neihah a lo hawng tawh a. State tinin hma an lakna atan Minister-te chu mahni State theuha lo hawng ve tura tih an ni.

WDC-PMKSY 2.0 hi 2021-2022-ah bul tan a ni a. Mizoramah Project 20 kalpui mek niin, khaw 52 a tuam mek a. Kum 5 chhunga hmalakna tur Project niin, March 2026-ah he Project kal lai hi tawp tura ruahman a ni.

WDC-PMKSY hian a tuam chin Project-ah ram bua leh leilung luangral tur ven leh humhalh bakah tuihna humhalh hna a thawk ber a. Hemi atan hian Major Activity hrang hrang, he’ng - Land Development, Soil & Moisture Conservation leh Water Harvesting Structure te kalpui a ni. Land Development hnuaiah Afforestation, Horticulture Development-ah te hmalak a ni a. Soil & Moisture Conservation hnuaiah Terrace, Contour, Bunding, Checkdam leh Wet Rice Cultivation (WRC) leh remchang dangte kalpui a ni bawk a. Water Harvesting Structure hnuaiah tuilakna leh dahkhawlna te, Percolation Tank leh Farm Pond te siam thin a ni bawk. Chumi atan chuan Programme dang kal ve te nen pawh thawhho (Converge) thin a ni. Tin, Project tuam chin khuaa mite zingah mi chhumchhia leh hmeithai, eizawnna mumal neilote tan eizawnna ruahman sakin, SHG leh Production System & Micro-enterprises (PS & ME) hmangin bul tanpui thin a ni.

Watershed Mahotsav neih hma hian February ni 17, 2025 khan ramchhung mipuite’n project hmalakna an hmelhriat lehzual nan Watershed Yatra kalpui lo ni tawhin, Watershed Van-in Mizoram chhunga WDC-PMKSY 2.0 project neihna khua zawng zawng a tlawh chhuak a. Hemi hnu hian mipuiten Project-ah sawrkar sum ringawt ring lova mahni tha leh sum an thawh ve theihna tur Campaign Janbhagidari Cup kalpui a lo ni tawh bawk a ni.

WDC-PMKSY hnuaiah tuihna humhalh leh siamthar nasa taka kalpui niin, Mizoramah pawh tuihna 1465-ah hma laka siamthar mek a ni a. Water Harvesting Structure pawh 2081 siam tawh a ni bawk. Horticulture development hi hectare 3559.41-ah kalpui a ni bawk a, Self Help Group 585 din tawh niin, mi 17260 hnenah he project atanga mimal eizawnna tur bul tanna pek a ni tawh bawk a ni.