UD&PA leh PHE-te'n Amrut leh SBM Scheme kalpui dan turah thawhhona thuthlung an ziak

Hnahthial Post | November 13, 2025, Aizawl: Vawiin khan Urban Development & Poverty Alleviation (UD&PA) Department leh Public Health Engineering (PHE) Department-te chuan Sewage Treatment Plant, Chite-ah Mizorama Atal Mission for Rejuvenation and Urban Transformation (AMRUT) leh Swachh Bharat Mission (SBM) scheme kalpui dan turah thawhhona thuthlung (Charter of Convergence) an ziak a. He hunah hian Pu K. Sapdanga, Minister, UD&PA chu khuallian niin, Prof. Lalnilawma, Minister of State, PHED chu khualzahawm a ni a. Thawhhona thuthlung hi UD&PA aiawhin Pu Lalmalsawma Pachuau, Secretary leh PHED aiawhin Pi Zodingpuii-te’n an hming an ziahhnan a ni.

Khuallian Pu K. Sapdanga chuan thu sawiin, department pahnih an thawk dun thei tur chu phurawm a tih thu leh an thawhhona tur, waste management chu hmasawnna tangkai tak, hriselna leh himna nena inkawp tlat a nih thu a sawi a. PHE Engineer-in-Chief atanga thu a dawn danin ni khata Aizawl khawpuiin tui a hman zat chu litre mtd 36 vel a ni a, drain mumal awm lohnaah chuan leiah a luang ral a, chu chu fura leimin a tam thin chhan pakhat a ni, a ti a. He thawhhona hi a hlawhtlin chuan khawpuia leimin venna tha tak a nih tur thu leh tuichhia chu sawngbawl (processed) a nih hnuah khawpui cheimawina atana hman theih a nih thu a sawi a. Tui hmangin khawpui chu hmasawnna rahbi thar kan kaipui dawn a ni, a ti.

Minister chuan UD&PA Storm Drain Project-ah bultanna atan Aizawl khawpui tan cheng vbc 61 leh khawpui dang tan cheng vbc 42 a awm thu sawiin, Aizawl khawpui tana department pahnihte tangkawp hmachhawp hlawhtlin hun chu nghahhlelhawm a tih thu a sawi bawk a ni.

Khualzahawm Prof. Lalnilawma pawhin thawhhona pawimawhzia sawiin, thawhhona thuthlung ziah a ni thei chu lawmawm a tih thu a sawi a. He project hlawhtlinna atan hian mipuite zirtir that a pawimawh thu leh drain tha neih pawimawhzia an hriat chuan an ram chhunga drainpipe kaltlang tir duh lo leh tuichhe sawngbawl sa hman tangkai hreh an tlem a beisei thu a sawi a. Aizawl mipuite leh district danga mite’n thawhhona hlawkna an tel ngei a beisei thu sawiin, UD&PA hotute hnenah Aizawl khawpui chhunga thal lai pawha kang ngai lo tuikhur survey list leh rainwater harvesting tank dah theihna hmun list-te chu a hlan bawk a ni.

Thawhhona thuthlung ziahna hunah hian UD&PA leh PHE department hotute leh thawktute bakah Bethlehem Vengthlang Local Council-te an tel a. Pu Lalmalsawma Pachuau, Secretary, UD&PA-in kaihruaiin, khawpui nuam siam tur chuan tui pekchhuahna leh tuichhe sawngbawlna tha neih a pawimawh thu a sawi a. He thawhhona hi Minister-te leh an department chante inkara inrintawnna leh rilru inhawng a awm avang chauha thleng thei a nih thu a sawi a. Pi Zodinthari, Engineer-in-Chief, PHE leh Pu Jacob Lalawmpuia, Director, UD&PA-te atangin report ngaihthlak a ni a. Pi Zodingpuii, Secretary, PHE-in lawmthu sawiin hun a khar a ni.

PHE E-in-C report atanga hriat danin Sewage Treatment Plant-ah hian ni khatah tuichhia megalitre 10 sawngbawl theih a nih laiin, tun dinhmunah chuan ni khatah megalitre 1 vel sawngbawl thin a ni.

UD&PA Director chuan convergence kal chhoh dan report a pekah UD&PA Department leh PHE Department hnuaia programme inang, khawpui leh thingtlang inthen hranna avang chauha kal hrang te, UD&PA kaltlanga Ministry atanga fund dawn, mahse technical thiamna hmanga enkawl ngei ngei ngai an nih avanga PHED lamin an enkawla awmze nei zawk tur te thlang chhuakin chung project hrang hrangah te chuan thawhhona Convergence ruahmanna siam a ni, tih a sawi a.

He Charter hnuaia department pahnihte thawhhona tur langsar ber pahnih SBM leh AMRUT project-a component tlangpuite chu a hnuaia tarlante hi a ni:

SBM hnuaia Solid Waste Management (SWM) component-ah Rs.30.68 crore a awm a. Hei hi ULB zawng zawng ah Solid Waste Management Centre (SWMC) sak nana hman tur a ruahman a ni a. SBM-G hnuaiah Plastic Waste Mangement Unit (PWMU)-te chu RD block-a sak tura ruahman a ni bawk. Heng SWMC leh PWMU te hi a remchanna apiangah a kalkawp ang a. Unit khat anga a tam thei ang ber thawhho a ni ang.

SBM(U) hnuaia Used Water Management (UWM) component hnuaia fund allocation Rs. 88.84 crore awm chu PHED in a thawk (execute) ang a, UD&PA-in fund a ruahman ang.

AMRUT Mission hnuaiah allocation Rs 157.78 cr a awm a. Hemi atang hian First Instalment pumpui leh second instalment tlem, a vaiin Rs 45 cr vel hman a ni tawh.

AMRUT component ho zingah Water Supply leh Sewerage & Septage Management te chu PHED in an enkawl a, Water Body Rejuvenation leh Green Space & Parks te chu UD&PA in an enkawl a ni.