Hnahthial Post | December 11, 2025, Hnahthial: Tv Lallianmawia, kum 22, Electric Veng, Hnahthial chu nimin khan Tuiphai lui an panna kawngah chin hriat lohin a awm a, zawn nghal nimahsela nizan thleng khan hmuh a la ni lova, vawiin hian a awmna YMA Electric Branch bakah Khawhri khawtlangin zawn beihpui an thlak dawn.
Kailawn tarlan danin Tv Lallianmawia hi a pa, Pu Lalthlamuana leh midangte nen an vaiin 8 vel chu nimin khan Tuiphai luia Sangha man tumin Hnahthial an chhuahsan a, Khawhri khua aṭanga kilometer 6 vela hla, Thingsai Road-ah lirthei te dahin Thangur ram link road-ah kein an kal a, hetia an kal lai hian Tv Lallianmawia hi inchhuih palhin a kalpui te hnungah a kal zui a, a ṭhiante pawh hian a rawn zui ve zel tih hmuin Link Road tawp aṭanga Tuiphai an pan dawn hian Tv Lallianmawia hi an hmu zui ta lo mai niin sawi a ni. Hetia chin an hriat loh hi zing dar 9 -10 vel a nih rin a ni a, a kalpui te hian theihtawpin a bona lai vel hi dapin an au a, an hmuh tak loh avangin Chhun dar 12 vel khan Khawhri YMA an hrilh a, Hnahthial lama a chhungte leh ṭhenrual ṭhate pawh chhoin Khawhri YMA hruaitute nen a theih ang angin zawng mahse hmuh a la ni lo a ni.
Nizan khan a bona kai velah hian a kalpuite leh mi tlawmngai ten riakin zawn hna an thawh bakah YMA Khawhri Branch hruaitute pawhin an riah chilh a, vawiin hian Khawhri khawtlang chuan zawn hna an thawk dawn a ni.
Tv Lallianmawia awmna YMA Electric Branch-te pawhin vawiin hian member nawlpuia zawn beihpui thlak an tum a, tukin dar 9 hian Hnahthial chhuahsanin a bona ram hi an pan ang. Vawiina hmuh a nih loh chuan naktukah YMA Electric North Branch te nen zawng chhunzawm lehin a ṭul dan anga YMA Sub-Hqrs-ah pawh thlen tum niin Kailawn chuan a tarlang a ni.
[News update awlsam taka i dawn theih nan, WhatsApp Channel hi lo join ve ta che: https://whatsapp.com/channel/0029Va5SRQ77dmeSCGESWy0d ]
Share it with your friends!
[Feedback at: chiefeditorhnahthialpost@gmail.com]
[For Advertistment contact: +91 9774 771 645]
HNAHTHIAL POST
Hnahthial Post Instagram:
Hnahthial Insta Facebook:
Hnahthial Post YouTube:
Hnahthial Post Twitter:
Tags
News