Mizo Zirlai harsate an zirna kawnga chhawmdawlna tur Students' Aid Fund tlangzarh a ni

Hnahthial Post | December 11, 2025, Aizawl: Mizo Zirlai Pawl (MZP) General Headquarters, Aizawl chuan December ni 10, 2025 (Nilaini) zan dar 7:30 khan, Woodland Hills, Zonuam-ah mizo zirlai an zirna kawnga harsatna an tawh avanga zir chhunzawm theilo leh a mamawhte tan a ban theih tur Students’ Aid Fund(SAF) chu tlangzarh a ni. Chief Minister Pu Lalduhoma chu Khuallian niin hun a hmanpui a, Students’ Aid Fund tlangzarh nghalin, Pu B. Lalchhanzova, Minister of State chuan he hun hi a hmanpui bawk.

He hunah hian MZP President, Dr. C. Lalremruata chuan thu sawiin, “Mizo Zirlai Pawl chu zirlai pawl kan nih angin, zirlai harsa MZP Pisapui-a tanpuina dil a rawn tlan lut tam tak alo tanpui tawh thin a, pawl in a kan sum neih a tam loh em avangin, tanpuina dila rawn lutte an beisei leh an mamawh angin kan lo tanpui thei thin lo a, chung avang chuan zau zawka mizo zirlaite an mamawhna anga kan tanpui theihna tur Students’ Aid Fund hi kan lo siam ta a ni” a ti.

MZP President chuan, Students’ Aid Fund hi a mamawh apiang tana ban phak tur a ni a, sum lo lut hi MZP ta nilo in, a mamawhte tana sem chhuak mai tu a ni dawn a, he fund hi chi hnihin Grant(a thlawna chhawmdawlna pek) leh Interest Free loan(a pung awmlo a pawisa puk)tura ruahman niin, SAF Management Committee te’n a tul leh tha an tih angin dilna lo lutte thlifimin a ngaihtuah thin dawn a ni. SAF Guidelines in a tarlan angin Mizo zirlai zirna ina in ziaklut zawng zawngte chauh huapzo tur a nih rualin, Thingtlang lam zirlai(Rural Students), pianphunga harsatna nei(Differently-abled students) an ni a, fund hman danah pawh inkhuahkhirhna dan(Strict Ethical Standards) siamin document diklo hmanga he fund hmuh tum an awm chuan dan angin an chungah hmalak a ni dawn a ni.

Khuallian Chief Minister Pu Lalduhoma chuan thu sawiin, MZP in a zirlai naupang, a bikin thingtlang leh hmun kilkhawr zawka mi, tanpui ngaite tanpuina tur Students' Aid Fund a ngaihtuah chhuak chu lawmawm a ti hle a, Zirlai pawl an nih ang ngeia zirlaite tana tha hmalakna a nei hi a inhmeh a. Tanpui ngaite kan intanpui tawn hian khawtlang leh ram nuam kan siam a, ringtu kan nihna zawna kan tih tur a ni bawk a. Midangte tanpui thei dinhmuna kan ding a nih chuan ui lovin i pe thin ang u, tiin mipuite a sawm a ni.

Chief Minister chuan, “He fund kaltlang hian zirlai harsa zawng zawngte a tanpui vek seng dawn lova. CM Relief fund-ah pawh hming dang vuah a dil nawn duh hial te an awm a, dik takin a mamawhtute hnenah ngei a thlen theih nan guidelines fel tak siam a ni leh pekchhuah a nih tur chu a tha hle a ni” a ti. Vawiin a harsa taka lehkha zir mek zawng zawngte hnenah - chhel taka bei fat fat turin a chah a. Retheihna leh harsatnate hi min chher hriamtu, mi puitling leh hmantlak ni tura min dinchhuaktu an lo ni fo thin. Tun hmaa kan mi hlawhtling tak tak, central service lo paltlangtute kha nuamsa taka lehkha zir an vang hle a. Inhlawh chawpin, retheihna leh hrehawmna tam tak paltlangin an bei a, an chhelin an tum a ruh hle thin, tiin zirlai naupangte chu taksa leh rilru chhel turin a fuih bawk.

Minister of State Pu B. Lalchhanzova, pawhin thu sawiin, “MZP in a zirlai harsate chhawmdawlna tur Students’ Aid Fund a ngaihtuah chhuak chu tha a tiin a phur hle thu a sawi a, midangte tana luangchhuak duh leh tanpuina pe duh tam tak an awm a, tanpui dan kawng hrelo tam tak awmin he SAF kaltlang hian an rawn luanchhuah ngei ka beisei a ni” a ti.

He SAF tlangzarhna hun hi MZP Vice President, Pu Sanghmingthanga kaihhruaina a hun hman niin, Territorial Youth Secretary(TYS) Major Richard Vanlalnghaka, chuan hunserh a hmang a ni.