Mizoram State Policy Coordination Committee an thukhawm; Endik tawh chinah Bana kaih dawngtu zaa 90 ten an thawk tha

Hnahthial Post | December 1, 2025, Hnahthial: Vawiin khan Mizoram State Policy Coordination Committee te chu an chairman Pu Lalduhoma, Chief Minister hovin CM Conference Hall-ah an thukhawm a, an hmalakna hrang hrangte an thlir a, Bana Kaih Scheme kalpui tawh zinga endik tawh chinah zaa 90 chuan hna an thawk tha tawk nia ngaih a ni.

Chief Minister chuan, Handholding chu sorkar flagship programme a ni a, department te chu an nitin hnathawh naa flagship scheme thilte lo ngaihpawimawh hmasa zel thin turin a chah nawn.

Meetingah hian DDK Aizawlin sorkar flagship programme-a thawhho an rawtna an ngaithla, an rawtna zirchiangtu tur team an din nghal a, a rang lama thu tlukna siam a ni ang.

Handholding hnuaiah thawhpui bank tam zawk an awm theih nan hmalak an rel a. A rang lama bawhzui tur a ni.

Cooperation Department-in Handholding hnuaia pawlin a dil theih loan dilna an thehluh project 18 te an thlir a, committee hian an project an ngaihpawimawh dan indawt siam hmasa turin Cooperation Department hi a chah a, a tul anga bawhzui a ni ang.

Animal Insurance Scheme (Livestock Insurance Scheme) hmalakna ngaihthlak a ni a, a thawh khat nan ran 3300 vel huama (cover) kalpui phawt a ni ang. Tunah hian AH & Vety hnuaiah Progress Partner mi 1010 an awm mek a, a tam zawk hian Vawk vulh an thlang a ni.

Animal Insurance hi National Livestock Mission hnuaia kal pui tur a nih angin, a guidelines ang chuan Central leh State sorkar tum tur bakah beneficiary contribution a tel ve thin a. Nimahsela, vawiina meeting hian Handholding Progress Partner ten insurance an tihna tura an tum ve tur hi Handholding atanga tumsak ni se, an ti.

Thawhpui Bank-te atangin Loan Component hnuaia loan dawng tura rawt tawh vawiin thlenga la dawng si lo te dawn loh chhan ngaihthlak a ni a. Loan hi pek tawh 287, bawhzui mek (pending) 280 leh en that leh tura Bank ten an thawnkir (returned) 113 an awm a ni. Hand Holding hi a thawh hnihna a kal leh mai tawh dawn avangin a thawhkhatnaa la chin fel loh te hi rang taka ching fel turin bank te hi hriattir an ni.

Handholding thawh hnihna atan Loan Component-a diltu hi mi 330 an awm leh mek a, nghak khawm lova endik nghal zel tur an nih avangin line department te chu che rang tura chah an ni.

A thawh hnihnaah vek hian CM Special Package diltute dilna 570 chu endik tura thlan an ni tawh a, a diltu leh endik tura thlan zat hi nitin a danglam ve reng a. Dilna hun hi a hrana hawn a ni tawh lo va, engtiklai pawha thehluh theih a ni.

Monitoring report hi AH & Vety, Horticulture, Fisheries, I&PR, LRS & WC leh Sericulture atangtein Monitoring report dawn tawh a ni a, an endik tawh china zaa 90 (%) vel te chu thawk tha tawka ngaih an ni.

Heng bakah hian an hmalakna kal lai leh hmachhawp an neih te an sawi a ni.