World AIDS Day, 2025 pualin Hnahthialah hun hman a ni; Hnahthial District-ah HIV hrik pai hmuhchhuah mi 252 an awm mek

Hnahthial Post | December 1, 2025, Hnahthial: Electric Veng Community Hall-ah Mizoram State AIDS Control Society (MSACS) buatsaihin World AIDS Day, 2025 puala hun hman a ni a. District AIDS Prevention and Control Committee (DAPCC) Chairman leh Bawrhsap ni bawk, Pi K. Vanlalruati chuan khuallian niin zirlaite chu HIV laka fihlim nan nun uluk turin a chah. Dr. Lalnunziri, Sr. Chief Medical Officer (CMO) chuan HIV chungchanga hriattur pawimawh zualte tarlangin HIV chu natna chikhat a ni tih hria a, a kai te chu thinhrik lo turin zirlaite a chah bawk.

Khuallian chuan hun hman chhan sawifiahin World AIDS Day chu 1988 atangin khawvel pum huapa HIV darh zel tur ven nan leh a kai mek te dinhmun hriatthiam nana hman thin a nih thu a sawi a. Kum 2030-ah chuan HIV hi khawvel atanga um bo emaw khuahkhirh emaw tum a nih thu sawiin chumi thlen dik nan chuan sawrkar-in nasa taka hma a lak tawh thu a tarlang a. Kohhran leh NGO hrang hrang puihna nen tun thlengin theihtawpa hma lak mek a nih thu sawiin a hlawhtlinna erawh mitin kutah a awm thu a sawi.

HIV kaina hluar ber pahnih chu Mipat hmeichhiatna hman khawlohna leh syringe thianghlim lo inhman tawm atangin a nih thu a tarlang a. Zirlai kalkhawmte chu he natna hlauhawm tak laka an fihlim theih nan nun uluk a pawimawh thu sawiin tun hunpui lo hnaiah hian fimkhur lehzual a tul thu a sawi a. Vawi khat nawmna chu nun tichhiat nana hmang lo tura chahin eng nawmna mah hi hma hun nena thleng lo turin a chah a ni.

Vei ni a in hria te chuan hlau lovin mahni leh kan laina hnaite him zawk nan in test tir a, enkawlna la hreh loh turin a chah a. Kan inzep avangin midang nun kan tihchhiatsak thei tih in hria a, a vei hmuhchhuahte chu an phalna lovin tu hnenah mah puan chhuah an nih dawn loh avangin in-test hrehna chhan tur a awm loh thu a sawi a ni.

Dr. Lalnunziri, Sr. CMO chuan Mizoram HIV +ve rate chu 2.35% a nih thu tarlangin min hnaih bertu state pawhin 2% an kai loh thu a tarlang a. India rama a ber kan nihna dang chu cancer veiah a nih thu tarlangin chu chuan kan ram dinhmun hi enfiah ngai tawh tak a ni tih a entir thu a sawi. He kan dinhmun thlak danglam thei awmchhun chu kan ram hma hun, tuna thalai leh zirlaite hi an ni tiin kan ram damna hi an kutah a awm a ni a ti a. Chu chu hre reng tura zirlaite chu chahin kan ram dam nan rilru leh ngaihtuahna lo hmang chhunzawm turin a sawm a ni.

Hnahthialah ngei pawh HIV hrik pai mi 252 an awm mek thu tarlangin fimkhurna tlakchham loh a pawimawh thu a sawi a. Chutih rual chuan AIDS chu natna chikhat ve mai a ni tih hria a, a veite chu thinhrik a, endawng lo turin a ngen a. Nun dai sual palh vang leh vanduai vanga vei te an nih thin thu sawiin kan mihring puite vek an ni tih hre chunga hriatthiamna mit nen en zawk thin turin kawlkhawmte chu a chah a ni.

Programme hi Pu Joeph Zokunga, Dy. DPC, chuan kaihruaiin Govt. Higher Secondary School naupangte bakah SDC, Pu Lawrence Lalhlanthara, Sub Hqrs YMA hruaitute leh Hoi Philoi client - IDU ten hun hi an hmanpui a. Pu Moses Lalchhuanawma, Project Manager, Hoi Philoi chuan lawmthu sawiin hun hi a khar a ni.