Hnahthial Post | January 22, 2026, Aizawl: Vawiin khan Art & Culture Department changtu Minister Pu C. Lalsawivunga chuan I&PR Auditorium, Treasury Square-ah Mizo Lal leh an tu leh fate inzawmkhawmna pawl (Mizo Chiefs’ Council) buatsaih Mizo Chiefs’ Council Souvenir 1946-2025 tlangzarhna hun chu khuallian niin a hmanpui a; Souvenir hi a tlangzarh nghal a ni.
Tlangzarh inkhawmah hian khuallian Art & Culture Minister Pu C. Lalsawivunga chuan thusawiin, Mizo Chiefs’ Council-in rei tak ata a lo thlir tawh Souvenir a khawr pum thei ta chu lawmawm a tih thu a sawi a. Mizote chu hmanlai ata tawh Lal neia inrelbawl thin kan nih angin, ram inrelbawldante lo inlumlet mahse, hnam chanchin leh nunphungah Lalte chuan dinhmun pawimawh tak an luah tih tarlangin, Minister chuan Laltedinhmun ropui tak hlimthla chhawm nung tura Zoram pum huap Mizo Chiefs’ Council a ding chu hlu hle a a hriat thu a sawi a. Ram leh hnam hmasawnna tura mipui thlan sawrkar apiangte chhawmdawltu ni tura kalkhawmte chu fuihin, ram rorelna leh khawtlang inrelbawlnaahte pawh theihtawp chhuahpui turin a chah a. Pi leh Pute atanga Zo nun ze mawi chhawm nun kawngah pawh thangtharte zirtirtu ni zel tura chahin, hmanlai ata tawh Lalte chu khawtlang inpumkhatna tura theihtawp chhuahtu an ni thin angin an tu leh fate pawh mipuite thinlunga ram leh hnam inpumkhatna tuhtu ni zel turin a fuih bawk a ni.
Mizo Chiefs’ Council hi Mizote’n lal kan neih thin lai hun, 1946 khan Mizo lalte’n, anmahni leh an thlah kal zelte insuihkhawm nan leh an hmakhua an sut ho nan an din a ni a. Aizawl-ah headquarter neiin, district khawpui 8-ahte Sub-hqrs an nei bawk a ni.
Vawiina Tlangzarh inkhawm hi Mizo Chief Council President Rev Mangchhuana Sailo-in kaihruaiin, kalkhawmte lawmna thu a sawi a. Er Lalnunmawia Sailo, Souvenir Editor-in ‘Souvenir Report’ a pe a. Pu S. Lianlula, Vice President-in Mizo Chiefs’ Council chanchin tlangpui a tarlang a. Pu Lalzarliana Sailo, Treasurer, MCC chuan lawmthu sawiin inkhawm hi a khar a ni.
[News update awlsam taka i dawn theih nan, WhatsApp Channel hi lo join ve ta che: https://whatsapp.com/channel/0029Va5SRQ77dmeSCGESWy0d ]
Share it with your friends!
[Feedback at: chiefeditorhnahthialpost@gmail.com]
[For Advertistment contact: +91 9774 771 645]
HNAHTHIAL POST
Hnahthial Post Instagram:
Hnahthial Insta Facebook:
Hnahthial Post YouTube:
Hnahthial Post Twitter:
Tags
News