Chief Minister hmaah MULCO leh NDDB ten thawhhona thuthlung ziak

Hnahthial Post | January 22, 2026, Aizawl: Vawiin khan Chief Minister Conference Hall-ah Chief Minister Pu Lalduhoma leh Cooperation Minister Pu PC Vanlalruata te hmaah Mizoram Milk Producers Cooperation Union Limited (MULCO) leh National Dairy Development Board (NDDB) te chuan Mizorama bawnghnute tharchhuah leh sawngbawlna lam tihhmasawnna tur thawhhona thuthlung (Memorandum of Understanding) an ziak.

MoU ziah inkhawm hi Pu Udit Rai Prakash, IAS, Commissioner & Secretary, Cooperation Department chuan a kaihruai a, Dr. Meenesh Shah, Chairman, National Dairy Development Board chuan an hnathawh dan tlangpui leh Mizoramin bawnghnute tharchhuah leh sawngbawl kawnga hma a sawn theihna tura an ruahmanna tlangpuite a sawifiah a ni.

Pu Lalduhoma, Chief Minister chuan thu tawi sawiin, he inremna hian bawnghnute tharchhuah kawngah min tanpui dawn ringawt lova, ran vulhtu mi tam takte eizawnna leh sum leh pai thawhchhuah a tipung dawn a ni. Mizote hi hmanlai ata ran vulh thin hnam kan ni a, ran vulhna tur ram kan nei tha bawk a. Tunlai thiamna leh khawl tha zawkte nena intuaitharin, kan theihnate hi hlawk zawkin kan hmang chhuak dawn a ni, a ti. Inremna chu chak taka kalpui a nih theih nan Project Monitoring Unit din a that tur thu a tarlang bawk.

Pu PC Vanlalruata, Minister pawhin thusawiin, India ram hmun hrang hranga sulhnu tha tak tak lo nei tawh NDDB nena kan thawkho thei tur hi kan phur a, cooperation lama hmalaknaah hma kan sawnpuiin, ranvulhtuten an chhawr hle dawn a ni, a ti a. National Dairy Development Board chungah lawmthu a sawi a ni.

Thawhhona tura inremna hi Mizoram sorkar aiawhin Pu Udit Rai Prakash, IAS in a ziak a, National Dairy Development Board aiawhin Pu S. Rajeev, Executive Director, NDDB in a ziak a, Mizoram Milk Producers Cooperation Union Limited (MULCO) aiawhin Pi Lalhmunliani, Managing Director chuan a ziak a ni.

National Dairy Development Board hian Ministry of Cooperation Flagship Scheme White Revolution 2.0 dung zuiin Mizoram state tan Comprehensive Dairy Development Plan a siam ang a, chumi ti hlawhtling tura Mizoram Milk Producers Cooperation Union Ltd te hmalakna tur a duang ang a, technical lam leh thil tul tinrengah NDDB hian a thawhpui dawn a ni.

Bureau of Animal Husbandry & Statistics 2024-25 tarlan danin kum 2024-25 chhungin India hmarchhakah Mizoram hian nitin bawnghnute a tharchhuak tlem ber a, a tharchhuah zat chu 64.4 Thousands KG per Day (TKgPD) a ni.