Hnahthial District-ah Registrar of Births and Deaths Annual Training buatsaih

Hnahthial Post | January 22, 2026, Hnahthial: Vawiin khan Horeb Conference Hall-ah Hnahthial District Research Office bultumin Hnahthial District chhunga Registrar of Births and Deaths Annual Training buatsaih a ni a. Hnahthial SDC, Pu Lawrence Lalhlanthara chuan khuallian niin mipuiten harsatna an tawh fo loh nan 100% Digital Registration neih vat an tum thu a sawi.

District Research Officer, Pu PC. Vanlalrova chuan he hun hi kaihruaiin khuallian, Pu Lawrence Lalhlanthara chuan Birth & Death registration khawihtute mawhphurhna leh pawimawhnate a sawi a. A tawi zawngin 'Chhiat Ni That Ni Officer' kan ni tiin rawn pantu thenkhat chu hlim taka nau nei zo chiah an nih laiin a then erawh lusun mangan lai a nih tur thu a sawi a. Chungah chuan mipui rawngbawltu kan nihna angin min dawrtute chu an rilru mila dawnsawn kan thiam a pawimawh thu a sawi a ni.

Lehkha zir sang tak ni lem lo, an application form pawh ziahsak ngai awm thinte pawh thiam taka kan lo dawnsawn a tul thu a sawi a. A tawpa kan signature leh seal chuang khan mi tam tak dam chhunga an nihna, an hming put hlen tur a ken tel tawh dawn avangin kan hna hi uluk taka kan thawh tlan a ngai a ni a ti.

Birth leh Death Certificate hi document pawimawh ber pakhat a nih avangin mipuite'n harsatna an tawh fo loh nan za a za (100%) Digital Registration neih theih vat hi an thil tum lian berte zing a mi a nih thu a sawi a. Tihsual tlêm thei ang ber neih tum tura kalkhawmte chu chahin mipuite tana thawk an nihna chu hre thar theih turin a chah a ni.

He hunah hian Pi B. Vanlalrengi, Deputy Director cum Deputy Chief Registrar of Births and Deaths, Economics and Statistics Department pawhin thu sawiin Registrar of Births and Deaths te mawhphurhna leh tihtur hrang hrang a sawifiah a. Pi Lalnunpuii Pachuau, SC chuan kalkhawmte hi presentation hmanga training pe in zawhna leh chhanna hun neih nghal a ni.