Hnahthial Post | January 28, 2026, Aizawl: Vawiin khan Planning & Programme Implementation hnuaia Mizoram Startup Mission leh Department for Promotion of Industry and Internal Trade (DPIIT) bultumin National Startup Day Mizoram Edition lawmna Aijal Club-a buatsaih a ni a. He hunah hian Chief Minister Pu Lalduhoma chuan Mizoram Bana Kaih Venture Capital Fund leh Startup Readiness Level of Mizoram a tlangzarh. Dr. Vanlalthlana, Minister, H&TE, Pu F. Rodingliana, C&I Minister leh Pu Lalnghinglova Hmar, Minister, LESDE ten an telpui.
Thusawiin Chief Minister chuan, kum tam tak chhung chu Mizoramah thiamthil leh ngaihtuahna tha tak tak nena sumdawnna bei an lo awm tawh thin a. Nimahsela, thlawpna leh puihna an hmuh that loh avangin an sumdawnna a thang thei lo va, an suangtuahna a tak ramah a chang thei lo thin. Entrepreneur-ten bultanna tur an mamawh ang pawisa an nei lo va, kawng kawhhmuhtu tha an nei lo va; sumdawnna lian leh hlawhtling din turin kawng zawh tur mumal an hre lo thin. He Bana Kaih Venture Capital Fund hian chutianga harsatna an tawh thin chu a rawn su kiang dawn a ni.
He fund hi sumthlawnpek a ni lo va, thawhlawm a ni hek lo. Rinna leh inrintawnna nena sum peipunna a ni. Entreprenuer hma hun êng tak nei leh thang zel tura theihna nei, eizawnna bultantute a pui dawn a, a bik takin heng — sumdawnna kalphung tha, thang thei tur leh danglam (innovative business model) ngaihtuah chhuak thei te, kut themthiamna lam hawi leh industry dina thilsiam chhuak (products) duh te leh tunlai thiamnaa (technology) innghata eizawnna siam duh te a tinzawn ang.
Pawisa hian sumdawnna a thantir thei a, inrintawkna hian hma lam pan turin a pui thung a. Chumi kawngah chuan kan tlangzarh tak Start Up Readiness Level of Mizoram hi a pawimawh ve thung a. Record vawnna a ni mai lo va, Mizorama entreprenuer-te leh eizawnna kawng danga hmalakna tur tar langtu pawimawh a ni. Miten theih tawp an lo chhuah dan te, an tih tak taknate a hmuh theih dawn bawk a ni.
SRL hmang hian, Entreprenuer chuan official recognition a hmu thei dawn a, eizawnna bul tan tìrte leh eizawnna tênau zawk beite chu investor, bank leh firm liante tan hmuh zung zung theih an ni ang a. Policy duangtute chuan data tharlam ber ber hmangin scheme tha leh rintlak zawk an duang thei ang a, firm lian tak takte chuan thil hrang hrang titute thil tih, an tihna hmun leh thlen chin chiang takin an hre thei bawk ang. Mizoram chhunga sumdawnna hrang hrangte hi langtlang, rintlak leh puih tlakin a siam bawk dawn a ni, a ti.
Heng kan hmalaknate hian kan thalaite hmakhua kan ngaihzia a ti lang a, hmasawn tuea kan tumruhzia pawh a ti lang a ni. Investor leh firm lianten Mizoram hi hmun kilkhawr tak anga hmu lovin, tih tur remchang tam em emna hmun a ni tih min hmuhsak se kan duh a. Kan thalaiten sumdawnna bultan hi thil theih leh career zahawm tak dinna a ni tih hria ila, heng programme kan duante hi tangkai, chhawrnaawm leh rah chhuah tha tak nei turin theihtawp i chhuah tlang ang u, tiin a sawm. Mizoram Startup Mission, Department for Promotion of Industry and Internal Trade (DPIIT), Govt. of India leh LESDE chungah lawmthu a sawi bawk.
Dr. Vanlalthlana, Minister, H&TE, Pu F. Rodingliana, Minister, C&I, Pu Lalnghinglova Hmar, Minister, LESDE te pawhin thu an sawi a ni.
Pu Lalrinzuala, CEO, MSUM chuan Bana Kaih Venture Capital chungchang sawifiahna a nei a, target ah 100 Cr. dah a ni a, sorkarin Bana Kaih atangin Rs. 20 Cr. a pe (tiam) a. A dang chu kawng dang atanga hmuh tum a ni. Pool fund a nih angin Security Exchane Board of India (SEBI) ah trust registration neih a ngai a, Senhri Investment Fund tia register neih a ni. Operating partners tur company tha tak tak thawhpui a ni bawk. SEBI hnuaia register a nih angin India ram ngaihtuah chunga kalpui a tul a, a tum bul ber erawh chu Mizoram entrepenuer-ten bul an tan nan emaw hma an sawn zelna tura hma an lakna tur sum, dan ang thlapa tumpui a ni. DPIIT hnuaia registered startup ten an dil thei a, chutiang registered startup chu 42 chauh Mizoramah an la awm avangin a dil thei hi neih tam a tul hle nia sawi a ni.
Mizoram Outstanding Entrepreneurs & Startups Award 2026 sem a ni a, Mizoram Outstanding Entrepreneurs & Startups Award 2026 – Ecosystem Enabler lawmman Dr. C. Vanlalramsanga, IES hnenah hlan a ni.
Pu Lalmalsawma Pachuau chuan kal khawmte lawmna leh Mizoram Startup Mission kal tlanga hna an lo thawh tawh dan tlangpuite a sawi a. Lalremtluangi, MZU Incubation Centre chuan Startup Readiness Level chanchin kimchang a sawifiah bawk.
Tags
News