Hnahthial Post | January 29, 2026, Aizawl: Vawiin khan Chief Minister Pu Lalduhoma chuan a office-ah National Cadet Corps, Mizoram Group Headquarters chu official taka hawnna a nei a. Assam state atanga awp thin NCC Mizoram chuan ama pualin Group Headquarters a nei tawh dawn a ni.
Pu Lalnghinglova Hmar, Minister, Sports & Youth Services Department chuan a telpui.
A hawnna hun tawite an hman zawhah Chief Minister hian Minister te, Maj Gen Anurag Vij, ADG, NER leh Brig GS Arora, Commander, Group Hq, Aizawl te nena inkawmna an nei zui a. Mizoramin NCC Group Headquarters a neih theih nana hma a lo lak tawh dan sawiin, kan thalaite hian NCC hi phur takin zawm se, nun kaihhruaina tha hmuh nan hmang se kan duh a, ruihhloin kan thalai tam tak a ti buai a, heng thil tha lo lakah hian thalaite kan ven a tul kan ti hle. Tin, thalai fel leh vengva tak tak kan neihten an theihna leh thiamnate zau zawkin pho chhuak thei se kan duh bawk a. Chungte ngaihtuah chung chuan Group Headquarters hi nei ve ila kan ti a ni, a ti.
Maj Gen Anurag Vij, ADG, NER chuan, thalaite chu mahni inthunun thei, mi tumruh, ram, khawtlang leh chhungkaw tana mi tangkai ni tur te, ruihhlo leh nun dan tha lo laka fihlim turtein a tul ang zelin kan zirtirin kan kaihruai a. State sorkarin chutiang lam hawi hmalak tul a tihna apiangah hma kan la thei a ni, a ti.
India hmarchhak thalaite hi an felin an fingvar a, nimahse India ram hmun dangah an inkiltawih deuh thin niin kan hria a. Zau zawka vahchhuahtir a, state dang mipuite nena inhriatpawhna tam zawk siamsakte kan tum a ni, a ti a. NCC Group Headquarters a neih tak avangin Mizoram a lawmpui thu a sawi bawk.
An awmna hmunhma tur an sawiho nghal a, state sorkarin an awmna tur ram a pek theih chuan an hmunhma chu an insak theih thu an sawi a. Ram pawh hi neih hlen tura inpek a ngai lova, luah hawh mai tur chi a ni.
Tunah hian Mizoramah NCC unit pali, cadets 8000 vel an awm mek a. Group Headquarters nena an awm chuan an ti lian chho zel dawn a ni.
Tags
News