Hnahthial Post | January 29, 2026, Aizawl: Vawiin khan Pu Lalbiakzama, Speaker, Mizoram State Legislative Assembly chuan Zo Re-unification Organisation (ZORO) buatsaih Chin-Lushai Conference vawi 134-na chu Lal Thanhawla Auditorium-ah khuallian niin a hmanpui.
Khuallian Pu Lalbiakzama chuan thu sawiin, Zofate rorelna pakhat hnuaia an awm theihna tura ZORO-te’n 1988 aţanga an beihna chu ropui a tih thu leh ZORO bultumin December ni 14, 2024-a Zo Indigenous Identity Card amah ngeiin a lo tlangzarh tawh thu a sawi a. Tharum thawh lova an movement kalpui mek chu chhunzawm zel turin a fuih a ni.
Assembly Speaker chuan Zofate awptu Sap hovin Chin Lushai Conference, January ni 29, 1892-a Zofate rorelna pakhat hnuaia awmtir tura an lo rel tawh tihhlawhtlin a nih tak loh avanga ramri siam chawpin a daidan rei tawh avangin Zofate zingah ţawng, rilru sukthlek, hawi her, ngaihsan zawng chenin lo inang lo ta hret hret mah se thlah khat, unau chhul khat kual na na na chu an danglam thui thei tak tak lo, a ti a. Zofate chu an awmna hmun apiangah inngeih taka nung ho a, tangkhawm turin a chah a. Rorelna pakhat hnuaiah awm thei rih lo mah se, thinlung hmunkhat puin an awm thei a ni, tih a sawi bawk.
Chin-Lushai Conference vawi 134-naah hian thupui atan ‘Inpumkhatna’ tih hman a ni a. Zing lam hun chu Pu R. Sangkawia, President, ZORO chuan kaihruaiin, Pu L. Ramdinliana Renthlei, Vice President-in ZORO hmalaknate a tarlang a. Dr. C. Lalremruata, President, MZP leh Pu B. Lalkhawngaihzuala, President, MSU-te’n thu an sawi bawk a ni.
Chawhnu lamah thupui sawihona hun hman niin, Pu Lalmuanpuia Punte, MLA & Adviser to CM-in a sawi hawng a. Tv. Lalnunfela Chawngthu, Gen. Secretary atangin UNO Report ngaihthlak niin, Pu Rorelliana, Vice President-in lawmthu sawiin hun a khar a ni.
Tags
News