Hnahthial Post | January 29, 2026, Aizawl: Vawiin khan Mizoram Agricultural Marketing (MAMB), International Fund for Agricultural Development (IFAD) leh Mission Organic Mizoram (MOM) tangkawp chuan ‘Private sector round table on Mizo Ginger cum Buyer Seller Meet 2026’ chu Aijal Club-ah an buatsaih a. He hun hi Pu C. Lalsawivunga, Minister, Horticulture Department chuan khuallian niin a hmanpui.
Minister Pu C. Lalsawivunga chuan he hunah hian thu sawiin, sawrkar chuan loneitute leh kuthnathawkte eizawnna tihhmasawna an dinhmun chawikan a ngaihpawimawh thu a sawi a. Mizorama kan thlai tharte hi chemical tel lo (organic) an nih avangin, a quality a thain an hrisel bik thu a sawi a. NiTi Aayog-in Mizoram chu Ginger Capital of India-ah min puang chu lawmawm a tih thu sawiin, Mizoram sawhthing hi a quality a tha-in, a rim a tui bik vang a ni, a ti a. Kan rama kan tharchhuah thlai leh thil dangte lei tura Mizoram pawn atang lo kalte chungah lawmthu sawiin, Buyer Seller Meet hlawk tak nei turin duhsakna a hlan a ni.
Pi Ramdinliani, Secretary, Agriculture & Farmers Welfare Department chuan kalkhawmte lawmna thu sawiin, GI Tag nei Mizoram sawhthing hi state dangte angin tharchhuak tam lo mah ila, a quality a that zawk thu a sawi a. Mizoram pawn atanga kan thlai tharte lei tura lo kalte nen kan indawrna kawngah dikna leh rinawmna a pawimawh thu a sawi bawk a.
Pu James Marc de Sousa-Shields, IFAD India Country Director, chuan FOCUS 2.0 lampang inhrilhhriatna hun hmangin, Mizoram hi state te nimahse, a danglam thu leh kan ram atanga kan thlai tharte a that bik thu a sawi a. Dr. K.C. Lalmalsawmzauva, Adviser to CM pawhin Mizoram chu industrial state-a hlankai a nih theih nana sawrkar hmalakna hrang hrangte a sawi a.
Pu Lalmalsawma Pachuau, Secretary, Planning & Programme Implementation Department pawhin Bana Kaih policy chungchang kalkhawmte hnena hrilhriatna neiin, Mizorama entrepreuner leh start up-te tanpuina tur Mizoram Banakaih Venture Capital Fund tlangzarh a nih tawh thute a sawi bawk a.
Vawiin Buyer Seller Meet-ah hian thawhhona thuthlung pahnih ziah a ni a. Chungte chu –
1. Ropuiliani Farmers Producers Company leh Kisaansay te inkarah Agreement
2. IRMA Iseed leh Mizoram Startup Mission-te inkarah MoU
Vawiin hunah hian India ram hmun hrang hrang atangin Investors leh Buyers lian tak takte sawm luh an ni a. Chungte chu - NAB Venture, IRMA Iseed, Acumen, ABC Fruits, Rupiya.app, Apple leh NSRCEL te an ni a. Anni hian Mizoram sawrkar nena kan thlai tharte leh prcessed food-te lei leh hralh kawnga thawhho theih dan kawng hrang hrang rawtna an rawn thlen a. Mizorama entrepreneur kan neih Zozik, Bio Farm, C Breeze, Tuibawn leh Lawm from the Hills-te nen pawh thawhho theih dan tur sawiho a ni a. Chawhnu lamah B2B session hman niin, Buyer leh Seller-te dawhkan khat kila in kawmna hun neih a ni.
Tags
News