Hnahthial Post | January 29, 2026, Aizawl: Mizoram Larsap General (Dr) Vijay Kumar Singh, PVSM, AVSM, YSM (Retd) chuan vawiin khan Students' Self Support Union buatsaih 39th General Assembly cum Ruby Jubilee lawmna Vanapa Hall-a neih chu khuallian niin a hmanpui a, ruby jubilee puala buatsaih lungphum a hawng nghal bawk.
Khuallian Larsap General (Dr) Vijay Kumar Singh chuan zirlai ni chunga mahni intodelh tum tlat Students' Self-Support Union-in kum 40-na hmel a hmu ta chu thilnung taka a lawmpui thu sawiin, an hmalakna chhuanawm tak chu midangte fuih phurtu a ni tih hriaa theihtawp chhuaha chhunzawm zel turin a chah a. Tumruhna leh beih hram hramna tel lo chuan hmalam pan a harsa tih sawiin, SSU hmalakna chu zirlaite cho phurtu pawimawh tak a ni, a ti a. Zirna senso leh inelna sang chho mek zel karah SSU chuan kut hnathawh a zahpui lova, sum leh paia intodelh leh mahni kut kea din a ngaipawimawh a, hei hian zirna hi degree neih nan mai ni lo, mi puitling chherchhuah nana pawimawh a ni tih a entir chiang hle a ni, a ti bawk.
Larsap chuan SSU-in zirlai mahni intodelh tuma theihtawp chhuahte chawimawina hun a buatsaih thin chu fakawm a tih thu sawiin, "Mahni kutkawih hmanga intodelhte chu an nghetin an tlo a, inthununna an nei thain engpawh hmachhawn dawn se an ngaihtuah awm lo nge nge thin a ni, a ti a. Zirlaite chu nakin huna Mizoram mai bakah India ram inghahna tur leh Viksit Bharat @2047 thlen theih nana kan ram nghahfak an nih thu leh, mawhphurhna nasa tak an neih thu sawiin, Mizo thalaite chu thiamna leh theihna nei tha tak an nih avangin an theihna zawnte hriaa thiambel tum turin a fuih a. SSU hruaitute chu a tul huna zirlaite puih theihna tur microfinance lam ngaihven turin a chah bawk a. Zirlaite chu an tumah dingnghet tlat tur leh dikna, khawngaihna, midangte zahna leh khawtlang rawngbawlna dah pawimawh tura chahin, "Hlawhtlinna tak tak chu mahni hlawhtlinnaah chauh ni lovin, midang kan dawmkan dan thlengin teh a ni", a ti bawk.
He hunah hian Tv Robinson Zomuansanga, Vice President, SSU Gen Hqrs. chuan inlawmna thu sawiin, Secretary General Tv Benjamin J. Malsawmdawnga hnen atangin report ngaihthlak a ni a. Tv Darhmingliana, President, SSU General Hqrs. hnen atangin thuchah ngaihthlak a ni a. Kum 40 kalta chhunga pawl hmalak dan video tawi thlir ho niin, Self Support Award 2025 dawngtu zirlai 3 te chu kalkhawmte hmaah koh chhuaha chawimai niin, zirlai dangte fuih phur nan an hmalak dan tlangpui chhiar chhuah a ni a. Tv James Ramdinmawia, Adviser, SSU Gen Hqrs. chuan lawmthu sawiin hun hman a khar a ni.
He hunah hian kum 2026-2027 atana SSU Gen Hqrs. hruaitu thar thlante Pu J. Lalramnghaka Ralte, ARO chuan a puang a ni.
President: Robinson Zomuansanga
Vice President: Lalrinmawia
Secretary General: Jacob Lalduhkima
Joint Secretary: Rinsangzela
Treasurer: Lalvenhlupuii Hnamte
Fin. Secretary: Lalrempuii
SSU hi May ni 27, 1985 khan Hrangbana College, Aizawlah din niin, thupui atan 'Zirna atana mahni intodelh' tih leh 'Kuthnathawh chawisan' tih an hmang a ni.
Tags
News