Hnahthial Post | January 15, 2026, Aizawl: Vawiin khan Land Resources, Soil & Water Conservation Department chuan Mizoram Chief Minister's Rubber Missions hnuaia rubber chingtute tan Rubber chin dan, a seng dan leh a seng hnua a sawngbawl zui dan leh a kung enkawl dan zirna (Scientific Training) Vanapa Hall-ah a buatsaih a. Chief Minister Pu Lalduhoma chuan a hawnna inkhawm telpuiin, Pu Lalthansanga, Minister chu khualzahawm a ni a, Dr. KC. Lalmalsawmzauva, Adviser to CM chuan Chief Minister hi a tawiawm.
Rubber enkawl dan lehkhabu a tlangzarh zawhah thusawiin Chief Minister chuan, UT kan nih ata kum sawmnga kan pel tawh a, loneia eizawng kan tam chungin eng thlai mah hi ka hmingthanpui ngai lo. A thlan tla nasa, a kut durh nasa te hi kan rethei em em thin. Mipui sorkar kan han ding a, kan Policy te kan han tipuitling chhova, hun reiloteah Ginger Capital of Indiaah min puang ta a ni. Sapthei pawh hi kan larpui theih, kan rama thlai tha duh tak a ni. Kan hmingthanpui theih thlai tha ber pakhat chu rubber hi a ni a. Kan ram hi Rubber tharchhuahna hmunpuia chantir tumin Chief Minister Rubber Missions kan duang chhuak ta a ni. He missions hi mawlmang takin kal kalpui lova Rubber Board of India te nena uluk taka kan sawiho hnu leh Tripura Rubber Missions kan zirchian hnua kan kalpui a ni, a ti.
A tira kan ruahman aia nasain hma kan la thung a. A chhan pawh rubber ching duh kan tam vang a ni a, thil lawmawm lam a ni. In hlawhtlin ngei theih nan sorkar chuan a tih turte a ti zel dawn a, a chingtute pawhin theihtawp in chhuah hi kan beisei che u a ni.
Ti ve mai mai tan hlawhchham theih a ni a, rubber la ching ngai lo tam takin in ching thar dawn bawk si a. A tih dan engkim hi in thiam a ngai a. He training hi tha takin in lo ngaithla dawn nia. Sorkarin in banah kan kai dawn che u a, kaihtlak ni ngei ang che u, tiin a fuih.
Pu Lalthansanga, Minister LR, S&WC pawhin thusawiin, sorkar chuan tumah thlei bik nei lovin hma a la a. Kan Chief Minister hi kuthnathawkte hmasawnna vei em em tu, amah ngei pawh huan siama hnathawk thin a ni a. Hei hi kuthnathawktuten kawng hrang hrangin an chhawr chho mek a ni, a ti.
He training-ah hian Rubber Board of India leh Servo Lubricants (IOCL) atanga mithiam lo kal ten Rubber chingtu mi 550 te hnenah Rubber chin dan leh enkawl zui dan te, Rubber hnai dan te, Rubber hnai sawngbawl dan te bakah Rubber kung tichhetu rannung laka ven dan te zirtirna an pe ang.
Mizoramah hian rubber chin theihna ram Hectares 50,000 vel a awm a, rubber hi thlai nghet, ramngaw siam thei thlai, tuihna humhalh kawnga tangkai, a hralhna tha tak, a hnai theih tawh loh hnua Thingzai atana hman zui theih ni si a nih avangin Mizoram Sorkar chuan uar zawka kalpui a tum a. Ni 18th October 2024 khan Chief Minister’s Rubber Mission a din a, he mission hnuaiah hian Land Resources, Soil and Water Conservation Department chuan kum 2025 kum tir atang khan hma la tanin, Mamit District leh Kolasib District chhunga ram 1000 hectare a zauah Rubber tiak kung 4,50,000 phun a ni tawh a, kum 2026 hian District hrang hrang pariata ram 2,575 hectare a zuavah Rubber tiak kung 11,58,750 phun chhuah leh vek tum a ni. Kum nga chhung kalpui tura duan niin, ram 11,500 hectare a zauah Rubber phun khah vek tum a ni.
Rubber chinna hmunte hi kawng sialsak an ni ang a, Rubber Roller Machine leh a hnaina hmanrua ngaihtuahsak an ni ang a, a hralhna pawh ngaihtuahpui an ni bawk ang. Kumin bikah hian rubber chinna hmun sawm leh pakhatah huan panna kawngpui kilometers 46.50 laih hman tum a ni.
“Farmers Training on Scientific Rubber Cultivation, Harvesting Techniques, Post-Harvest Handling and Pest Management” hi Lunglei, Hnahthial, Lawngtlai leh Siaha District chhunga Rubber chingtute tan hun remchang hmasa berah buatsaih leh tum a ni.
Pi R. Lalmuankimi, Secretary, Land Resources, Soil & Water Conservation chuan training hawnna inkhawm hi a kaihruai a, Rev. K. Lalthanmawia, Adviser, Mizoram Rubber Society (MIRSO) chuan hunserh a hmang a, Pu K. Hrangzuala, President, MIRSO chuan thu tawi sawiin a kaihhruaina hnuaiah rubber chingtu kal khawmten an pawisa dawn chu dik taka an hman tur thu an tiam a ni. Er. Vanlalmuanpuia Chhangte, Director, LR, S & WC chuan lawmthu sawiin a khar a ni.
Tags
News