Hnahthial Post | January 15, 2026, Hnahthial: Sawrkar Laipui ruahman lawkna angin vawiin khan Mizoram District hmun hrang hrangah Lirnghing thlen thulha chetlak dan tur nunchan zirna - Mock Exercise on Earthquake chu neih a ni a. Hnahthial District-ah zing lam chu hmun hnih - DC Office leh Bazar Veng-ah te neih a ni a. Zan lamah chuan Addl. DC Complex-ah nunchan hi neih chhunzawm tura ruahmanna siam a ni. Nunchan zirnaah hian Champhai hmar lam atangin 7.1 magnitude lir nghing anga ngaih a ni.
Nunchan zirna hi zing dar 10-ah tan niin DC office leh Bazar veng, Pu J. Lalnunmawia te inah neih a ni a. DC Meeting Hall-I chu Control room atan hman niin Chief Executive Officer - Addl DC, Pu Zothanmawia Khiangte chuan Quick Response Team leh Emergency Services te chu a ko khawm a. Site Coordinator, SDC Pu R. Vanlalruata chuan briefing pe in lirnghing vanga tuar lem chhang chhanchhuaktu turte chu Site-ah a tir chhuak nghal a ni.
Nunchan zirnaah hian QRT, Police, NGO leh Hospital staff-te tang rualin hliam tuar lemchangte chu an bawihsawm a. QRT leh Police-te chuan hliam tuarte chu zawn chhuakin Triaging zawh hnuah Ambulance-in hliam tuar leh mitthi lem changte chu Hospital-ah a phur chhoh nghal a. Hospital lama Doctor leh staff te chuan hliam tur lem changte chu an lo enkawl nghal a ni.
District tinah Live video coverage neih a ni a. Live feed-ah hian chhiatna thlen dan kimchang - Detailed Incident report hi CEO chuan Aizawl lama Control room-ah a pe bawk a ni.
Site-I, DC Office-ah hian Mitthi (Dead) lem chang - 2, Hliam na tuar (Critical) lem chang - 2 leh Hliam tenau tuar (Minor Injured) lem chang- 6 an awm a. Site- II, Bazar Vengah hian Mitthi (Dead) lem chang - 1; Hliam na tuar (Critical) lem chang - 1 leh Hliam tenau tuar (Minor Injured) lem chang - 2 an awm a ni.
Tlai lam dar 5-ah nunchan hi Addl DC Quarters-ah neih chhunzawm leh tura ruahmanna siam a ni.
Tags
News