Hnahthial Post | January 13, 2026, Sairang: Vawiin khan Chief Minister, Pu Lalduhoma chuan Sairang Horticulture Centre-a Mizoram Agricultural Marketing Board-in Bana kaih (Handholding) Scheme hnuaia a din, Ginger Processing Unit chu a hawng. Pu C. Lalsawivunga, Horticulture Minister chu khualzahawm a ni.
Thu sawiin Chief Minister chuan, kum tam tak chhung kan lo vei tawhte a takin a chang chho mek a, a lawmawm hle mai. He processing unit dinna kawnga mawhphurtu MAMB leh Horticulture department chungah lawmthu ka sawi a ni.
UT kan nih a chin kum 54 vel a lo ni tawh a, loneia eizawng tamna ram ni chungin eng thlai mah hi kan la hmingthanpui ngai lo. Tunah chuan Mizoram chu Ginger Capital of India tia hriat kan ni chho tan ta a. Kan loneitute thawh rah zarah kan hmingthang chho mek a ni. Sapthei pawh hi nasa taka kalpui a thain kan hria a, larpui thama ngah kan tum leh dawn a ni.
Sawhthing vangin chhungkaw tam takin sum leh pai tam tak an lalut a, mipuiten pawisa an neih avangin sumdawngte tan a lo hlawk a, kohhran thawhlawm chenin a pung a. Tin, a thlawna sem kan ti tawp a, moral reformation a thleng mek a, kan thawhrim rah ngei kan tel mek hi a hlu a ni.
Sawhthing hi thlaleh February ni 2 atangin kan lei tan leh dawn a. Mizo kutchhuak, a zailepna khawl leh a tihrona khawl eng emaw zat hi collection centre-a dah a, an lo hman theiha chhawpsak kan rilruk mek. Chu chuan sawhthing process-na kawngah min pui nasa hlein kan ring.
Vawiina kan hawn hi kan sorkara a process-na hmasa ber a ni a, a hmunhma hian a dawl zawh avangin tihlen a thain ka ring a. A tul angin tihlen kan tum ang. A pawimawh ber erawh chu a enkawltu tura thlan Good Faith te an ni a, an kutah hian a hlawhtlin leh hlawhtlin loh a innghat thui hle a ni.
Khuanglengah Processing Unit dang kan din mek a. A enkawltu turin tawnhriat nei tha tak Opickpure te kan thlanga. Chhingchhipa khawl hluite kan tuai thar tawh bawk a. Hma kan sawn zel a ni.
Organic lama tan lak hi state dangte chunga kan len theihna remchang tak a nih avangin organic lamah sorkar hi a kal uar deuh deuh dawn a, loneitute inbuatsaih ang u.
Nikuma sawhthing kan leiah khan thil dik tawk lo a inrawlh nual tih kan hria a. Endiknate kan kalpui hial a. Mi tam takin a man pawh an dawn tlai phah a ni. Khatiang thil dik lo kha a awm kan remti dawn ngai lova, engkim dik tak zelin kan kalpui dawn a. Kan fimkhur dawn nia. Loneitute pawhin mahni thua lo cho mai lovin collection centre-te lo ngaichang zel ula, mumal taka kal kan tum dawn nia. Sawhthing lei lai chuan a lei leh hralh lama sorkarin mawhphurhna a pek zawng zawngten ngaihpawimawh berah in lo nei dawn nia, tiin a ngaihpawimawh hrang hrangte a tarlang a ni.
Khualzahawm Pu C. Lalsawivunga leh Dr. KC Lalmalsawmzauva, Adviser to CM, Handholding te pawhin thusawina an nei a ni.
Mizoram Agricultural Marketing Board (MAMB) chuan Sairanga Horticulture Centre hmun hma leh building thenkhatte chu private company hnenah sawhthing process nan outsource turin October ni 17th 2024 khan Expression of Interest (EOI) a chhuah a. EOI chhang tute zing atang hian Good Faith, Saron veng te chu thlan chhuah an ni.
Anni hnenah hian Mizoram Agricultural Marketing Board chuan Horticulture Centre-a heng building, Transit Godown, Integrated pack house, Manager quarters leh Chowkidar quarters te hi MOU fel taka ziak in kum 5 chhung atan 13th January, 2025 khan a hlan a ni.
Good Faith hian 2025 chhungin an theih ang anga ginger processing leh marketing an kal pui mek laiin, Mizoram Agricultural Marketing Board chuan, Horticulture Centre-a Transit Godown-ah hian Rs. 71 lakh sengin ginger processing line (khawl) a bun leh ta a. He processing unit pawh hi Good Faith enkawl nghal tura tih a nih angin, vawiin hian Mizoram Agricultural Marketing Board leh Good Faith ten MOU sign nghal a ni.
A hawnna inkhawm hi Pi Ramdinliani, Secretary, Agriculture & Farmers' Welfare chuan a kaihruai a, nikum atangin Mizoramin sawhthing kan thar nasa si a, a hringa hralhna hmunpui (Mundi) kan hlat si a. A sawngbawlna din hi tihmakmawh a ni, a ti. Dr. David Fangzauva, Deputy Manager, MAMB chuan technical report a pe a, sum ruahman Rs. 71 lakh atangin Rs. 61 an hmang tawh a, hmabak tlem an la nei a. A processing unit hi chu vawi tam tak an lo ti chhin tawh a, fel taka kalpui theih a ni. A silna khawl chak tak bakah Electric hmanga a tihrona khawl, batch khatah kg 200 zel tiro thei a awm a. Electric chauha tihro a nih chuan a tihrona man a san dawn avangin Ni zung chakna hmanga vawi khata kg 2000 tihro theihna a awm tel. Sawhthing ro hralhna hi a that avangin a tihrona khawl chak leh lian zawk mamawhna a sang hle nia sawi a ni.
Sawhthing sawngbawlna hawnnaah hian bialtu MLA Pu TBC Lalvenchhunga, Adviser to CM leh Pu Lalchhuanthanga, MLA leh official thahnem tak an tel a ni.
Tags
News