Hnahthial Post | January 13, 2026, Champhai: Sports & Youth Services Minister Pu Lalnghinglova Hmar chuan nizan khan Lianpui Community Hall, Champhai District-ah Tuipuiral Games & Sports Association (GSA) buatsaih Tuipuiral Annual Sports Meet vawi 53-na chu a hawng a, an kick off and spike off programme-ah khuallian a ni.
Minister Pu Lalnghinglova Hmar chuan thu sawiin Tuipuiral GSA ruahmanna a tha a tih thu sawiin an inelna hi a hlu tih a sawi a, infiam mi 500 chuang an mikhual thei hi a ropui a tih thu a sawi. Hruaitu nih hi a hautak em em a, pawisa leh tha an seng nasa a, an inpekna a fakawm tih a sawi a, nakin zelah theihtawp chhuah zel turin a fuih bawk. Sports leh politics inpawlh hi a tha lo a, politics khelh nana sports hmang lo turin mipui a sawm a. Heng intihsiakna hi awmze nei zawka buatsaih a nih zel theih nan ngaihtuahna sen a tul thu a sawi a, sports discipline hrang hrang telh zel a tul thu a sawi. Sports discipline hrang hrang ti chhin turin inkhel mite a fuih a, Olympics-ah pawh medal la pha an la ni thei tih sawiin a fuih a. Tuipuiral Sports Meet-a an sawm avangin lawmthu a sawi a, intihhlimna a hmuhnawmin a ngaihnawm a tih thu a sawi a, football petin inelna chu a hawng. Minister hian Lianpui Middle School chuan computer an mamawh em em chu sawrkarin a pe thei dawn a ni tih a sawi nghal a, Tuipuiral GSA chu sports hmanrua hrang hrang a pe bawk a, Tuipuiral GSA tanpuina pek thin chu ₹50,000 atangin ₹1,00,000-ah nakum atangin tih san a ni ang tih a puang bawk a ni.
He hun hi Tuipuiral Games & Sports Association (GSA) Treasurer Pu Pamunga'n a kaihruai a, General Secretary Pu Samuel Lalrinsanga'n inhmelhriattirna neiin report tawi a pe. Thusawi leh intihhlimna chi hrang hrang - mal zai, lam etc. a awm bawk a, jersey tlangzarh nghal bawk a ni.
He hunah hian Mizoram State Sports Council Secretary Pu Henry C. Lalrawnkima leh khaw hrang hrang GSA member te leh khawtlang hruaitute an tel a ni.
