DM&R Minister-in 'State Level Mock Exercise on Earthquake' thlirletna meeting (debriefing) hmanpui

Hnahthial Post | January 16, 2026, Aizawl: Nizan khan National Disaster Management Authority (NDMA) leh Disaster Management & Rehabilitation (DM&R) Department tangkawp buatsaih ‘State Level Mock Exercise On Earthquake’ thlirletna (debriefing) meeting chu Assembly Secretariat Annexe Conference Hall-ah neih a ni a. He thutkhawm hi DM&R Minister Prof. Lalnilawma chuan a hmanpui.

Minister Prof. Lalnilawma chuan Mizoram pum huapa lirnghing avanga chhiatna a lo thlen thulha chet lak dan tur enchhinna hlawhtling taka buatsaih a ni chu lawmawm a tih thu a sawi a. Mizoram sawrkar hnuaia Department hrang hrangte, sawrkar laipui hnuaia agency hrang hrangte leh tlawmngai pawlte kara thawhhona tha a awm avanga mock exercise hlawtling taka neih a ni, a ti a. Bureau of Indian Standard (BIS) in Seismic zonation a tihchhuah thar berah India Hmarchhak pum chu Zone 6-ah a awm avangin lirnghing a lo thlen thulha chet lak dan tur inzir leh enchhin chu thil pawimawh tak a nih thu a sawi a.

Minister chuan hetiang hmalakna-a state dang nena thawhho a khat thu tarlangin, niminah Kolasib district mock exercise-ah Assam State Disaster Response Force an rawn tel thei chu lawmawm a tih thu a sawi a. Khuarel chhiatna thleng thei hriatlawkna (Early Warning Sytem) neih ve pawimawh a tih thu tarlangin, chhanchhuah leh chhawmdawl hna thawhna tura hmanrua kan neih sate bakah a aia tha lehzual zawkte pawh neih belh ni se a tih thu a sawi bawk a ni.

Debriefing meeting hi Brig. Ravinder Gurung (Retd), Sr. Consultant, (ME&IRS), NDMA, Govt of India chuan a kaihruai a. District tina DDMA-ten Video Conference-in meeting hi an lo chhim ve a, DDMA Chairman-te leh district tina head observer-ten vawiina Mock Excercise an kalpui dan leh Mock Excercise atanga an thil zirchhuah leh hmasawnna ngaihna lai leh rawtna an neihte report an pe a. Chief Observer Pu P.C. Lallawmsanga IPS (Retd), Former Principal Secretary, DM&R atang pawhin nimina Mock Excercise a hmuh dan leh rawtna a neihte ngaihthlak a ni bawk.

Brig. Ravinder Gurung (Retd) pawhin thusawiin, Mock Exercise-a tel zawng zawngten tihtakzeta an mawhphurhna an hlen chu lawmawm a tih thu a sawi a. Mock Exercise tha leh hlawhtling ber pawl a nih thu tarlangin, sawrkar laipui hnuaia agency hrang hrangte, Department hrang hrangte leh tlawmngai pawlte zingah thawhhona tha tak a hmuh thu a sawi bawk a. Mizorama khuarel chhiatna thleng thei zinga hlauhawm ber chu lirnghing a nih thu sawiin, NDMA-in Mock Exercise pawimawh tak a huaihawt chu lawmawm a tih thu a sawi a ni.