Hnahthial Post | January 27, 2026, Hnahthial: Mizoram Journalists' Association(MJA) Hnahthial District chuan vawiin khan I&PR Pisa, Hnahthial-ah Annual Conference leh hruaitu thar thlanna hun hmangin DIPRO, Pu F.Lalrinfela chuan khuallian niin a hmanpui a. "Chhantu nei lo leh ngaihsaktu nei lo mipuite aw in ni a, sum leh pai ah hlawk lo mah se ram leh khawtlang rawngbawlna pawimawh tak in thawk a ni" tiin theihtawp chhuah zel turin a fuih.
Journalism chu Democracy hnukpui pawimawh tak zinga pakhat a nih thu sawiin "Demoracy pawh hi Dawhkan ke pali ang deuh hi a ni a, pakhat a tliah chuan a ding thei lo ang deuhin Journalism pawh hi a chhiat chuan mipuite rorelna khawvel hi a chhe ve dawn tihna a ni" tiin kum 1975 a India rama Emergency puan a nih pawh khan mipuite aw ka chhuahna 'Media' chu an thil chhut chah hmasak a nih thu a sawi a. "India danpui hnuaiah mitinin ngaihdan leh duh zawng puanchhuah theihna zalenna zau tak kan nei a,kan hman tangkai thiam a tul hle a ni" a ti.
Journalist hlawhtling leh ngaihsanawm ni turin taimak a pawimawh thu leh Mipuite aw ka ber tur kan nihna hria a, tan la thar turin MJA member-te chu a fuih a. "Kan thuchhuah reng reng hi kan rin aiin a thleng thui thei a, mi rilru sukthlek thui takin a kaihruai thei bawk tih hre rengin fimkhurna kan vawn tlat a pawimawh hle a ni" tiin an thuchhuak te uluk lehzual turin a chha a. Hnahthial-ah Chanchinbu chhuak regular tak tak a la awm chu lawmawm a tih thu a sawiin Hnahthial hmel lanna pawimawh tak pakhat an nih avangin tan la zel turin a chah a ni.
He hun hi MJA Hnahthial Vice President, Pu C.Lalbuatsaiha chuan kaihruaiin an President Pu F.Zosangliana chuan member-te fuihna thu a sawi a. Chawhnu lamah Kum 2026 - 2028 chhung atana MJA Hnahthial hruaitu turte thlanna hun hmang nghalin hengte hi thlan an ni :-
1. President : C.Lalbuatsaiha, Editor, Hnahthial Today
2. Vice President : F.Zosangliana, Editor, Calathea
3. Treasurer : VL.Liansanga, Editor, Kailawn
MJA Hnahthial-ah hian tun dinhmunah member 6 an awm mek a ni.
Tags
News