Hnahthial Post | January 27, 2026, Aizawl: Vawiin khan Chief Minister Pu Lalduhoma chuan a office-ah Pi Angela Lusigi, Resident Representative of the United Nations Development Programme in India chu a kawm a. UNDP in Mizorama hma an lakna hrang hrangah lawmthu a hrilh a, hmalakna zau zawk nei zel turin a sawm.
Chief Minister hian Mizoram a rawn tlawh avanga lawmthu lo hrilhin, UNDP hmalaknate avangin lawmthu a lo hrilh a. NITI Aayog Sustainable Development Index report thar bera Mizorama district pathumte chu top tena an lan thu te, Mizoram chu ram ralmuang leh eirukna tlemna a nih thute a hrilh a. Kum 2047 ah Mizoramin India GDP zaa pakhat tal lo thawhchhuah ve tuma ruahmanna an kalpui thu sawiin, an ruahmanna (vision) a hlawhtlin theih nan Mizorama UNDP hmalaknate ti liana ti zau zel turin a ngen a ni.
Pi Angela Lusigi chuan Mizoram chu nuam a tih thu sawiin, tun hnaiah hmasawnna duhawm tak tak a neihte chu a lo hriat thin thu a sawi a. UNDP hmalakna leh an ngaihpawimawh zualte (priority) Chief Minister hnenah hian a hrilh bakah state sorkar ngaihpawimawh hmasakte (priority) a zawt bawk.
Chief Minister hi Pu TBC Lalvenchhunga, Adviser to CM, Pu Vanlaldina Fanai, Commissioner & Secretary to CM, Pu Lalmalsawma Pachuau, Secretary, Planning leh official dangten an tawiawm a ni.
Tags
News