Hnahthial Post | January 28, 2026, Aizawl: Nimin chawhnu dar 2:00 khan Pu Lalnghinglova Hmar, Minister of State, Sports & Youth Services Department chuan MINECO-a a office ah tunhnaia India rampum huap inelna a medal la infiammite lawmpuina hun a hmanpui.
He lawmpuina hunah hian nikum October 31 leh November 1 chhunga Bhopal, Madhya Pradesh a neih 34th All India GV Mavlankar Shooting Championship a 25m Centre Fire Pistol (Sr. Master Men Category) a gold medal la Pu Lallianmawia, IPS (Rtd.), nikum November 16-20 chhunga Hyderabad a National Sub-Junior Judo Championship 57 kg category) a silver medal la Vanlalramdinpuii leh November leh December a UTT National Ranking Table Tennis Championships, Indore leh Ranchi a neihah te bronze medal la ve ve thei Jeho Hlimnakulhpuingheta te hnenah lawmpuina thilpek hlan a ni.
Sports Minister Pu Lalnghinglova Hmar chuan, "Vawiinah hian inelnaa hlawhtlinna chang a, medal latute kan lawmpui takzet a ni. Hmasawnna hi engtinnge kan neih ang tih hi kan ngaihtuah fo a tul a. Hmasawn tur hian coach tha, infrastructure tha neih a pawimawh a, chutihrualin a pawimawh ber erawh chu a mihring a ni. Mahni kan pawimawh ber a, hmunhma leh hmanraw lamah state dangte kan tluk pha chiah lo a nih pawhin keimahni’n kan zir phawt chuan India ram huap inelnaah kan hlawhtling thei tih hi a chiang." a ti.
Sports Minister chuan Mizoram sawrkarin hmathlir thui tak nei chungin sports a kalpui tih sawiin, "India ramin kum 2036-ah Olympic Games thlen ngei tumin ngawrh takin hma a la mek a, chumi thlirlawk chuan Mizoram ah Vision 2036 kan kalpui. India in Olympic hi thleng thei ila, India aiawhtu zingah Mizote kan tel ve lovang tih hi a hlauhawm. Hei vang hian 2036 thlirlawk hian hma kan la zel. Mizo infiammi a tam thei ang ber tel ngei tumin theihtawp chhuah a ngai hle a, medal lak beiseina awm san deuhna tur infiamna discipline-te kan thlurbing dawn bawk a ni." tiin a sawi belh.
Lawmpuina hun hi Mizoram State Sports Council Secretary Henry C. Lalrawnkima chuan a kaihruai a. Infiammi hlawhtlingte chhungte bakah sport association hruaitute leh coach te an tel bawk a. Nimin lawmpuina hunah hian infiammite bakah manager leh coach-te pawh lawmpuina pek tel an ni.
Tags
News