Hnahthial Post | January 28, 2026, Aizawl: January ni 27, 2026 khan Ministry of Jal Shakti buatsaihin, Jal Jeevan Mission (JJM) hnuaia thingtlang khuaa tui lakte enkawlzui dan tur chungchanga, ruahmanna siam dan tur sawi hona hun, ‘Minister-Level Policy Dialogue on Sustainable Operation & Maintenance of Rural Drinking Water Services’ Delhi-ah neih a ni a, Pu C.R Patil, Union Minister of Jal Shakti hona hnuaiah State tina PHED leh RD/LAD Minister-te nen sawi hona hun hi hman niin, Mizoram PHED Minister Prof. Lalnilawma pawh he hunah hian a tel a ni.
Prof. Lalnilawma chuan Mizoram dinhmun tlangpui sawiin, Mizoram chu phai lam ang a nih loh thu te, kan tui lakna hnarte pawh khua atanga hla tak taka awm an nih hlawm thute leh chuvangin Operation and Maintenance (hnathawh leh enkawlzui) pawh khawtlangin an enkawl tur atan chuan a hautak bik thute sawiin, ‘keni ang tlangram tan chuan chona lian tak a ni a, chutihrual chuan theihtawp kan lo chhuah ang’ a ti a. Hetih rual hian India ram pum huapa JJM sum, Ministry, central sawrkar-a tang rei lutukte pawh release sak thuai turin a ngen ghal bawk a ni.
Jal Jeevan Mission (JJM) hi central sawrkar programme niin kum 2019 atang khan Mizorama thingtlang khaw tinte tan, tui connection a thlawna pekna tur scheme a ni a, tun dinhmunah hna hi zawh thawkhat tawh a ni. Kum 2019 atanga Kum 2025 chhungin Solar Pumping Scheme – 188, Gravity Scheme (Khawl tellova tui lak) – 657 leh Electric Pump hmanga Tui Pump – 7, avaiin 852 thawh zawh tawh a ni a, Mizoram thingtlang khua zawng zawngah hmalak a ni.
Minister Prof. Lalnilawma hi RD&AD Commissioner & Secretary Pu R. Zarzosanga; PHED Secretary Pi. Zodingpuii; PHED Engineer-in-Chief Er. Zodinthari te bakah PHE leh RD&AD official dang ten an tawiawm a ni.
Tags
News