Hnahthial District-a Mock Exercise kalpui dan tur relin thukhawm

Hnahthial Post | January 8, 2025, Hnahthial: Vawiin khan Hnahthial DC Meeting Hall-ah District Disaster Management Authority Chairman leh Bawrhsap ni bawk, Pi K. Vanlalruati kaihhruaiin Hnahthial District chhunga State Level Mock Exercise neih dan tur ruahmanin thutkhawmna neih a ni a. Hnahthial District-ah January ni 15 hian lirnghing vanga chhiatna thlen thulha chet lak dan tur nunchan zirna - State Level Mock Exercise on Earthquake chu district dang ruala neih tur niin hemi ni hian Day:- 09:00 a. m. atanga 1:30p.m. leh Night :- 4:00 p.m. atanga 06:00 p.m. inkar ah te neih tur a ni ang.

Thutkhawmnaah hian Bawrhsap chuan office hrang hrang aiawh a rawn kalkhawmte hnenah thutkhawmna neih a nih chhan sawifiahin kumin Mock Exercise-ah Mizoram tan Lirnghing thlan a nih thu leh Hnahthial District bik tan chuan nunchan zirna hmun turah Sawrkar pisa leh mimal in awmna hmun (Residential area) te thlan an nih thu a sawi a. Office hrang hrang aiawhte chu an chanvo hrang hrangte hrilhfiahin hmalak dan turte sawi ho nghal a ni a. Mizoram chu lirnghing thlen theihna hmun hlauhawm berte zinga mi kan nih avangin kan nunchan zir tur pawh a tak tak anga ngai a, mahni chanvo theuhvah theihtawp chhuah turin a chah a ni.

Nunchan zirna hmun tur atan hian DC Office, Additional DC Quarters Complex leh Bazar Veng hmun thenkhatte thlan an ni a. Nunchan zirnaah hian office hrang hrang, Quick Response Team (QRT), khawtlang leh tlawmngai pawl hruaitute bakah thuthar lakhawmtute tel tura beisei an ni. Mock Exercise hi tun thla ni 15 hian neih tura ruahman niin hemi hma, January ni 13 hian table top Exercise neih a ni ang.

Thutkhawmnaah hian SP, Pu Shivam Siddharth; Addl DC, Pu Zothanmawia Khiangte; DRDO Project Director, Pu HD Lalpekmawia; PHED EE, Er. K. Lalkima; SDO Sadar, Pi Esther Leihang; District Medical Superintendent, Dr. Zosangliani; BDO, Pu Hmingmawizuala; SDPO, Pu Zonghinga; PWD SDO, Pi K. Lalramchuani; SDC, Pu R. Vanlalruata; DIPRO, Pu F. Lalrinfela; DTO, Pu Joseph Lalthansanga Pachuau; P&E JE, Pu S. Vanlalchunga; CMO Office aiawh leh QRT te bakah YMA lam aiawh te an tel a ni.