Aizawl-Hnahthial Students' Union ten Zirlai titha chawimawina hun buatsaih MLA Pu Jeje Lalpekhlua chuan a hmanpui

Hnahthial Post | January 6, 2025, Hnahthial: Nimin chawhnu khan Aizawl Hnahthial Students' Union (AHSU) buatsaihin Horeb Conference Hall-ah ‘Zirlai Titha Lawmpuina’ hun hman a ni a. South Tuipui Bialtu MLA, Pu Jeje Lalpekhlua chuan khuallian ni a hmanpuiin zirlai chawimawite chu Hnahthial hma hun an ni tih hre reng chunga, taima leh discipline taka hun hmang chhunzawm zel turin a chah a ni.

Khuallian chuan kalkhawmte chu zahna chibai bukin hun huaihawttu, AHSU chu Hnahthial khua tilangtu pawimawh tak an la nih chhunzawm zel avangin lawmthu a sawi a. Zirlai chawimawite chu an thawhrimna leh an beih tang tangna avangin tun dinhmun thleng an ni tih a hriatpui thu sawiin chutih rual chuan hmabak an la ngah tih hre reng tur leh chuvang chuan tha thlah lovin, thangthar lo la awm zel turte entawntlak ni thei turin tan la zual sauh sauh turin a fuih a. Kan ramah sorkar hna in min daih vek dawn loh avangin thiam thil dang nei a, eizawnna kawng dap a tul tan tawh thu sawiin chumi lam chu ngaihven tel turin a chah nghal bawk a ni.

Pu Jeje Lalpekhlua chuan Hnahthial District leh a bial South Tuipui tan theihtawp chhuahin hma a lak thin thu a sawi a. Zirna kawngah a bik takin hma a lak nasat thu sawiin zirlai titha chawimawina - MLA Award siam a nih bakah in luah mai tur awm lohna, a bial chhung thingtlang khaw pali ah zirtirtu te luah tur, quarters sak mek a nih thu te a sawi bawk. Zirlai naupang harsatna avanga zir chhunzawm thei lo, lehkha thiam thei si an awm a nih chuan a hnena thlen thin tura chahin tanpui dan tur kawng zawnpui an nih tur thu a sawi a ni.

He hunah hian graduate chin chunglam, zirlai titha mi 23 hnenah chawimawi hlan an ni a. Inkhawm hi AHSU President, Lalneihchunga chuan kaihruaiin AHSU Secretary, Joseph FC. Lallawmkima’n report a pe a. A duh apiang tan thusawi theihna hun hawn a nih hnuah Tv. Lalhmingmuanpuia Renthlei, Asst. Secretary, AHSU chuan lawmthu sawiin hun a khar a ni.