Thingsai PHC Poor Fund puala Charity Kite Festival hlawhtling taka neih a ni

Hnahthial Post | January 1, 2026, Thingsai: Nimin chhun dar 12 aṭanga tlai dár 4 inkar khân Thingsai Tlaizawng, Thingsai Police Station leh Thingsai PHC ṭangho chuan Thingsai PHC poor fund pualin Sipai tlâng Thingsaiah Lehkhachaih runpui (Charity Kite Festival) an buatsaih a, mipuiin an hlut hle.

Lehkhachaih runpui hi Pu K. Lalsiammawia, VCP Thingsai chuan khuallian niin a hmanpui a, hawnna hun a hmang nghal. Thu sawiin khuallian chuan Naupangte hlimna leh lawmna buatsaih ruala mi harsa zawkte ṭanpuina hun remchang siam a ni hi thil ropui tâk a ni a, kum dangah pawh tih chhunzawm zêl chi a ni a ti.

Thingsai khaw cheimawina atân hmun hrang hrangah pangpar leh thing phun a ni a, Tlaizawng/Chhawkhlei phun leh vantlang thil buatsaihte dimdawi thiam ṭheuh turin kal khawmte a sàwm bawk.

Mizoram pum huap ang pawhin Lehkhachaih runpui buatsaih hi a khât êm êm a, Lehkhachaih runpui buatsaih thei kan ni hi thil lawmawm chhinchhiahtlak leh ropui tâk a nih thu VCP hian sawiin a buatsaihtute chungah lawmthu a sawi bakah Chhim lamah phei chuan a hmasa bêr kan ni hiala a hriat thu a sawi.

Vawiina lehkha chaih tura inziaklut zât hi mi 101 an ni a, Group 5 ah ṭhen niin round 5 chaih a ni a, round tina chaih thui/sei bêr hnenah lawmman pek ṭheuh an nih bakah Lehkhachaih zinga upa bêr Pu F. Zothankhuma (kum 70), Lehkhachaih zinga naupang bêr Malsawmhlua Chhangte (kum 3), Lehkhachaih mawi bêr K. Vanlalngaihsaka, Lehkhachaih lian bêr Pu Haleluia (feet 6½ square) te'n lawmman an dawng bawk.

Vawiin hun hmannaah hian pawisafai ₹8,800 hmuh a ni a, cashless transfer hi lo lut mêk a la awm avangin chhut fel a la ni lo deuh. Tel zawng zawng leh chhimtute zawng zawng chungah buaisaihtuten lawmthu an sawi.