Hnahthial Post | January 26, 2026, Hnahthial: India Danpui duan champha vawi 77-na pualin HDSC/HDFA Turf Ground-ah Hnahthial District Bawrhsap, Pi K.Vanlalruati chuan hnam puanzar pawt pharhin Republic Day ropui taka lawm a ni a. Khuallian chuan hnam puanzar a pawh pharh hnu hian parade contingent sawm(10) chibai bukna chu chhang letin thusawina hun a hmang nghal a ni.
Bawrhsap chuan India ram, mipuite rorelna ram ni tura Danpui duan a nih champha kan thleng leh ta chu lawmawm a tih thu sawiin hnam hrang hrang, ze hrang hrang lungrual taka kan awm khawm theih chhan chu he Danpui hi a nih thu a sawi a. Ram Danpui duantu, hruaitu hmasate chu zahna chibai bukin India ram hmasawn ruala Hnahthial District pawn hma a sawn ve tawhna te chu a tarlang a. Kum 2025 chhung pawn Office hrang hrang - District Transport Office, District Veterinary Hospital leh Land Revenue Office bakah Panchayat Resource Centre te chu hawn a nih thu tarlangin National Informatics Centre, (NIC) Office pawh an in hawn tan ve mek thu a tarlang a, District chhunga Office hrang hrang hmalaknate chu a tarlang bawk.
Bawrhsap chuan heng hmasawnna zawng zawng thlen theih chhan chu mipuite leh sawrkar thawhhona a nih thu sawiin inlungrualna pawimawhzia tarlangtu a nih thu a sawi a. Sawrkar, NGO leh mipuite an tan rual chuan Hnahthial District chu District hmasawn ber an ni thei a ni tiin zirlai kalkhawmte chu District leh ram innghahna tur an nih avangin zirna lamah theihtawp chhuah a, inlungrualna rilru vawng nung zel turin a chah nghal a ni.
Republic Day lawmnaah hian Parade Contingent sawm (10) awmin Ceremonial Parade Commander, Govt. Hnahthial College NCC leh Govt. Southern High School pipe band-te hnenah special prize hlan an ni a. School parade contingent ti tha pathum(3) te hnenah lawmman sem a ni bawk. Lawmman dawngtute chu:
1st Prize : Govt. Southern High School Girls
2nd Prize : Baptist English School
3rd Prize : Presbyterian English School
Luidung nungchate leh sangha thlahpun hun chhunga man khapna, Closed Season humhalh kawnga YMA branch tihtha pathum te hnenah lawmman sem a ni.
1st Prize: YMA Venglai Branch
2nd Prize: YMA Model Branch
3rd Prize: YMA Chanmari Branch
Lawmman sem zawh hian National Anthem sa in hnam puanzar chibai bukna neih a ni a, Republic Day lawmna hun hi khar a ni.
Bawrhsap thusawi kimchang chu link ah hian chhiar theih turin dah a ni :
Tags
News