Hnahthial Post | January 17, 2026: MNF Senior Vice-President Dr R Lalthangliana, MLA chuan nimin khan a bial Dampa huam chhunga West Phulpui, Saithah, Parvatui, Lallen, Chhippui leh Kawnmawi khuate a tlawh a; zirtirtu zingah Mamit district-a sikul aṭanga hlawh la, mahse, khawpui lama thawk daih si mi 150 chuang an awm niin a sawi.
Dr R Lalthangliana hian khawtlang hruaitute leh political party hruaitute hmasawnna tur an sawihonaah, “Mamit district chhung aṭang hian zirtitu 150 chuang Mamit district school aṭanga hlawh la, khawpui lama anmahni thawk daih si an awm thu min hrilh. Hei thil ṭha lo tak, siamṭhat thuai ngai a ni,” a ti.
Dampa bialah sorkar sikul building nei mumal lo leh chhe tawh tak tak a tam thu sawiin R Lalthangliana chuan, “Hmalak thuai a nih theih nan bialtu MLA ka nih angin sorkarah ka thlen ang,” a ti a; Silsuri-ah zirlai naupang 160 awmnaah zirtirtu nghet lo pahnih chauh an thawk a, building luah tur an nei mumal lo niin a sawi.
Dampa bialtu MLA chuan, a bialah link road/economic road mamawhna a lian hle tih a hmuh thu sawiin, “Khawtlang hruaitute’n mamawh hrang hrang in sawite hi Delhi ka kal hmasak ber huna thlen chi te, ṭhenkhat chu la nghah deuh ngai chite pawh a awm tih ka hmu a, theih ang angin hma kan la zel ang... Bialtu MLA ka nihna anga state sokara nawr chi leh central lama nawr chite pawh a awm ang a, uluk takin hma kan la dawn a ni,” a ti.
[News update awlsam taka i dawn theih nan, WhatsApp Channel hi lo join ve ta che: https://whatsapp.com/channel/0029Va5SRQ77dmeSCGESWy0d ]
Share it with your friends!
[Feedback at: chiefeditorhnahthialpost@gmail.com]
[For Advertistment contact: +91 9774 771 645]
HNAHTHIAL POST
Hnahthial Post Instagram:
Hnahthial Insta Facebook:
Hnahthial Post YouTube:
Hnahthial Post Twitter:
Tags
News