Hnahthial Post | January 16, 2026, Aizawl: Nizan khan India International Centre, New Delhi-ah “Global Sports Education Convention 2026 and National Awards Ceremony” neih niin, he hunah hian India rama sports leh physical education huang chhunga tithate hnenah ‘National Sports and Physical Education Awards’ sem a ni a, Mizoram chuan sports chawikan leh tihhmasawn kawnga hma la tha, “Best Upcoming State Promoting Sports and Physical Education” lawmman a dawng.
He award hi Mizoram sawrkar aiawhin Pu H. Dolianbuaia, Joint Secretary, Sports & Youth Services Department kutah nizan khan hlan a ni.
Global Sports Education Convention-ah hian mithiam sawm bik leh state hrang hrang aiawhte’n India rama sports leh physical education hmasawnna tur ngaihtuahhoin, an sawiho zingah India in Commonwealth Games 2030 a thlen tur chungchang a tel.
Mizoram sawrkarin hmathlir mumal tak nei chungin sports-ah hma a la a. Olympic Games 2036 thlir chunga Mizoram pum dapchhuaka sports coaching leh talent zawnna tur ‘Empowering Mizoram Sports (EMS)’ chu January 14, 2025 khan Chief Minister Pu Lalduhoma’n a hawng a. EMS hnuaiah hian Mizoram khaw hrang hranga naupang kum 8 leh 15 inkar te chu Olympic sports discipline thlanchhuahah ni 15 (darkar 45) chhung training pek chilh an ni dawn a, Mizote thiam zawng, 2036 Olympic Games-a India ram aiawha an tel theihna tur nia ngaih sports discipline-te ngaihpawimawh a ni. Talent nei tha bikte chu residential training pe in uluk lehzuala enkawl chhunzawm an ni ang.
EMS hi Mizoram khaw kilkhawr ber thlengphak tura duan niin Public Private-Partnership (PPP) Mode-a kalpui tur a ni a. Sawrkarin coach leh sports equipment a tum ang a, coach duh khua/veng te'n coach-te veivahna, thlenna leh ei leh in an tum ve thung ang. Hei hi khawtlangin neitu nihna rilru an put a, theihtawp an lo chhuah theih nana ruahman a ni. Coach te hi thingtlang atang pawha online-a awlsam taka dil theih turin ruahman a ni.
EMS kalpui dan hi tihfel a ni mek a, he mi hnuaiah hian December 1 - 5, 2025 chhung khan ‘Trainers Training’ neih a ni a. December 15-18, 2025 chhung khan JICA India nen tangkawpin sports coaching-a mithiam bik Prof. Masamitsu Ito, Nippon Sports Science University, Tokyo chuan Hawla Indoor Stadium-ah coach te training a pe bawk a ni.
Sports-ah a bulthut atanga hmalak tulzia hriain , Mizoram State Sports Council leh Samagra Shiksha Mizoram te chuan May 1, 2025 khan 'Grassroots Sports Development Program (GSDP)' a thawhdunna thuthlung (MoU) an ziak a. Sports Minister Pu Lalnghinglova Hmar chuan a taka kalpui turin August 21, 2025 khan Ramhlun Indoor Stadium-ah a hawng a ni.
GSDP in a tum ber chu sawrkar school-a sports training mumal taka kalpui a ni a. Mizoram hmun hrang hranga centre 46 ah, kum 6 atanga kum 14 inkar zirlai 1000 chuangte chu sports discipline thlan bikah zirtirna pek niin, theihna nei sangte tana kawng inhawng zel tura ruahmanna siam a ni. Mizoram sawrkarin Empowering Mizoram Sports' a kalpui mek nen ṭang kawp thei turin GSDP hi duan a ni bawk.
Sports Minister hmalaknain Mizorama sports tournament lian leh hlun pahnih - Tuipuiral Annual Sports Meet 2025 leh Tuichangral Games 2025-ah %te mumal zawka talent haichhuah kalpui a ni a. Sports discipline an kalpui ṭhinte bakah Tuipuiral Games-ah Boxing leh Archery telh thar niin, Tuichangral Games-ah kum 8 leh 16 inkar tan Boxing, Wrestling leh Weightlifting telh thar a ni bawk. Heng sports discipline telh thara training kalpuina leh tournament buatsaihna senso chu sawrkarin tumin, naupang talent tha zawnna’n hman nghal a ni.
Mizoramin awmze neia hma thlir thui tak neia sports a kalpui chhoh mek hi Golbal Sports Education Convention-ah hian state zinga sports hmasawnna tura hmathlir nei ṭha lawmman hlan a ni ta a ni.
[News update awlsam taka i dawn theih nan, WhatsApp Channel hi lo join ve ta che: https://whatsapp.com/channel/0029Va5SRQ77dmeSCGESWy0d ]
Share it with your friends!
[Feedback at: chiefeditorhnahthialpost@gmail.com]
[For Advertistment contact: +91 9774 771 645]
HNAHTHIAL POST
Hnahthial Post Instagram:
Hnahthial Insta Facebook:
Hnahthial Post YouTube:
Hnahthial Post Twitter:
Tags
News