Hnahthial Post | January 16, 2026, Aizawl: Vawiin ni 16 January, 2026 (Zirtawpni) chawhma dar 11 khan MZP General Headquarters leh Zo Reunification Organisation General Headquarters buatsaih-in; Vanapa Hall kawtah “Border Fencing duh lohna punkhawm” buatsaih a ni a. He hun hi Pu Sanghmingthanga MZP Vice President-in a kaihruai.
He hunah hian, MZP President Dr. C Lalremruata leh ZoRO President Pu Sangkawia ten thu an sawi a. Border Fencing duh lohna thu an au rual bawk.
Dr. C Lalremruata MZP President chuan; "India sawrkarin, an ram buaina avanga Myanmar atanga rawn lutte chhuanlama, Mizoram ram tha lai zawng zawngah ramri hung a tum hi kan hrethiam thei lo. Ramri hi mihring siam chawp mai a ni a, Pathianin Zofate ram leh hnam min din sak a, Zofate ram rorelna pakhat hnuaia awm kan duh mek laia, Zofate chenna ram insi reng, thendarh a daidanna bang siam a ni tur hi kan pawm thei lo a ni. India sawrkar pawhin kan duhna hriain an hmalakna thulh nghal turin kan ngen a ni” a ti.
Pu R. Sangkawia ZoRO President pawhin; Zoram hi ka ram a ni a, Zofate hian mawhphurhna sang tak kan nei a ni. Chuvangin, thendarh nih kan duh lova. Zofate rorelna pakhat hnuaia awm hi kan hmathlir leh chanvo a ni a ti.
United Nation Declaration on the Rights of Indigenous People’s (UNDRIP) pawhin, “hnam khat unau zalen taka in kalpawh a remtih laia hetia thendarh tuma hmalakna hi pawm harsa kan ti a ni” a ti bawk.
Border Fencing hi, rilru leh taksaa unau inthen hlenna tur a nih avangin kan duh lo a. Ramri hung hian ruihhlo a kan harsatna a sutkian a rinawm loh a, buaina kan tawh tur nen a man lo hle ang a ti bawk.
ZoRO President chuan, Mizoram state sawrkar-in, ni 28 February, 2024 khan Border Fencing duh lohna official resolution a siam a. Hei hi vawiin thlengin thiah a la ni lova, kengkawh zel turin sawrkar kan ngen a, kan thlawp tlat dawn a ni a ti bawk.
MZP leh ZORO chuan vawiin tlai vek khan, India Prime Minister Pu Narendra Modi hnenah Border Fencing ngaihtuah nawn tura ngenna lehkha Mizoram Governor kaltlangin a thehlut a. A copy hi Union Home Minister a pe bawk.
