RD&AD Minister hovin 'Vibrant Villages Programme - II' chungchang zir chianna leh sawi hona hun hman a ni

Hnahthial Post | January 19, 2025, Aizawl: Vawiin khan Rural Development & Administration Department hmalaknain India ram ri-a cheng, thingtlang khuate tih hmasawnna tur chungchang zirchianna leh sawi hona hun, ‘Workshop on Vibrant Village Programme -II’ chu Planning & Programme Implementation Department Conference Hall-ah neih a ni a. RD&AD Minister Prof. Lalnilawma’n hovin, RD&AD Commissioner & Secretary Pu R. Zarzosanga’n inkhawm hi a kaihruai a. VVP kaihhnawih department hrang hrang-a Secretary rual te, District hrang hrang atanga Deputy Commissioner, Block Development Officer leh hotu dangte bakah ram ri viltu sipai hotute pawh telin, Ministry of Home Affairs lama hotute pawh online-in he hunah hian an tel a ni.

RD&AD Minister chuan VVP-II chu Mizoram tan a pawimawhzia sawiin, ram himna leh hmasawnna thlentu pawimawh tak a nih tur thu a sawi a. Mizoramah kum 1993 chho atang tawhin Border Area Development Programme tih hmangin ram ri-a khuate tih hmasawnna turin hmalakna kalpui a lo nih tawh thu sawiin, ‘tun thlenga hmasawnna kan hmuhte erawhin duhthu a la sam tawk lo hle a ni’ a ti a; VVP-II hnuaiah hian Mizorama RD Block 16 atangin, thingtlang khaw 109-te chu Ministry of home Affairs-in Vibrant Village Programme kalpuina atan a thlan chhuah thu sawiin, Northeast state zingah pawh khaw thlan chhuah tam berna pawl kan nih thu leh lawmawm a tih thu a sawi a; he workshop chhima kalkhawm officer rualte pawh rilru siam thara, heng ram ri-a khuate hi khaw hrisel, khaw intodelh leh hmasawn vibrant village an nih ngei theih nana ngaihtuahnate senga, tih tak zeta hma la turin a fuih bawk a; he VVP hi a hlawhtlin theihna tur chuan ‘department dangte nen pawh tan ruala, inpekna leh thawh hona tha tak neih a pawimawh dawn a ni’ a ti bawk.

Vawiin inkhawmnaah hian Pu V. Lalengmawia, Additional Secretary, RD&AD leh Pu A. Chhalai, Executive Engineer, RD&AD ten Border Area Development Programme kalpui a lo nih tawh thin dan leh Vibrant Village Programme-II kalpui a nih dan turte power point hmangin an en tir a, anni bakah hian ram ri enkawltu sipai, BSF, Assam Rifle leh BRTF hotuten an hmalaknate an tarlan bakah Ministry of Home Affairs lama hotute’n online/virtual-in hun an rawn hmang bawk. Vawiin workshop-ah hian Deputy Commissioner tinte mawhphurhna tur te, VVP Digital Portal hman dan tur te, hna thawh theih leh theih loh tur thilte leh thil pawimawh hrang hrangte sawi hona hun hman a nih hnuin Pu K. Lalrohlua, Director, RD&AD chuan lawmthu sawiin hun hi a khar a ni.

Vibrant Village Programme hi India sawrkarin ram ria awm (International Land Borders) khuate thawm chakna tur atana a hmalakna pawimawh tak niin kum 2023 khan VVP-I tiin kalpui tan a ni a, VVP – I chuan India - China ram ria awm khuate a huam a; VVP -II erawh chuan India – Myanmar leh India _ Bangladesh ram ria awm khuate huam thungin, State 15 leh UT 2 ahte kalpui tur a ni dawn a, kum 2024-2024 atanga kum 2028-2029 chhung atana thawh tura ruahman a niin hemi atan hian cheng vaibelchhe 6839 ruahman a ni a, 100% central funding a ni tawh dawn bawk a ni. Mizoramah chuan District 8 huam chhunga RD Block 16 hnuaia thingtlang khaw 109 te, he hmalakna tur atan hian thlan chhuah an ni.

He programme hnuaiah hian 4 Thematic Areas - a fur a thala lirtheih tlan theihna (all-weather road connectivity) te, inbiakpawhna (telecommunication) te, Television leh Electric connection (on-grid connectivity) te chu ngaihpawimawh hmasak tur niin heng bakah hian 10 Intervention Areas – Livelihood Generation; Road Connectivity; Villager Infrastructure & health facilities; Energization; Television & Telecom Connectivity; Promotion of Tourism, Culture & Outreach activities; Financial Inclusion; Empowerment of Youth & Skill Development; Cooperative development, SHGs, FPOs leh Educational Infrastructure te a awm bawk a, BADP nen a danglamna chu, 100% sum Central-in a tum tur a nih tawh bakah Inrfrastracture chauh ni tawh lovin mipuite eizawnna leh hriselna te, India ram laili zawka awmte nena inkungkaihna tha zawk an neih theihna turte ngaih pawimawh lehzual a ni tawh dawn a ni.