Hnahthial Post | January 15, 2026, Aizawl: Vawiin chawhma dar 10 :00 khan Aijal Club ah Social Welfare Minister Pi Lalrinpuii chuan sorkar program ngaih pawimawh berte zinga mi “Ruang Phurh” online portal a hawng.
“Ruang Phurh” online portal hi Mizoram State e-Governance Society (MseGS), ICT Department siam a ni a, ruang phurh sorkar sum hmanga kalpui mek chu chak zawka kalpui a nih theih nan leh mi tam zawkin awlsam zawk a an chhawr theih nan ruahman a ni.
Pi Rinpuii chuan sorkarna an siam hma pawh a an lo ngaih pawimawh tawh manifesto a an neih tih hlawhtlinna a ni tih sawiin, ruang phurh scheme tluang taka hmasawn zawnga kalpui theih a ni ta chu lawmawm a ti a, MSeGS te nen tha taka an thawhho avanga lawmthu sawiin, portal hi hmang tangkai turin mi zawng zawng a sawm a, tihchangtlun zel a nih tur thu a sawi bawk.
Ruang phurh online portal hi google play leh app store atanga download theih niin, vawiin ni thlenga ruangphurhna application lut tawh zat hi 1680 a ni a, cheng nuai 175.85 pek chhuah tawh a ni.
Pi Lalzarmawii Commissioner & Secy, SWWCD in a kaihruai a, MSeGS mithiamte hnen atangin technical report ngaihthlak a ni.
Tags
News