Hnahthial Post | January 29, 2026, Aizawl: Vawiin khan Aizawl-a National Cadet Corps Group Headquarters hawn thar tur leh hemi puala NCC Mizoram Girls Under – 17 football tournament kharna hun Aizawl Lammuala buatsaihah Sports & Youth Services Minister Pu Lalnghinglova Hmar chuan khuallian niin hun a hmanpui a. NCC Northeast Region Directorate, Shillong atanga lo kal Major General Anurag Vij, Additional Director General chu khualzahawm a ni.
Sports & Youth Services Minister chuan NCC Group Headquarters Flag pawt pharhin, Mizorama NCC Group Headquarters hawn a ni dawn ta chu thil chhinchhiahtlak tak a nih thu a sawi a. ‘Tun hma zawnga NCC batallion hrang hrangte, Silchar Headquarters awpna hnuaia awm thin chu, tunah chuan Brigadier thutchilhin Aizawl-ah ngei Group Headquarters kan nei ve tawh dawn a ni’ a ti a. Hei hian nasa zawkin kan thalaite tan pawh hlawkna a thlen ngei a beisei thu sawiin, national leh international level intihsiakna leh eizawnna kawng hrang hrangahte pawh, mizo thalaite tana kawng sialtu pawimawh tak a nih tur thu a sawi a. NCC chu thalaite’n nunkawng dik an zawh theihna tur te, ruih hlo bawiha an tan lohna turte leh ram leh hnam tana mi hmantlak an nih theihna turtea an nunkawng sialtu leh chhertu pawimawh tak a nih thu sawiin, thalai tam lehzualin NCC an zawm theihna tura hmalak a nih tur thu a sawi.
NCC Cadet-te tan football leh intihsiakna hrang hrangte kum tin buatsaih ziah thin a nih tur thu sawiin Mizoram NCC kaltlanga India ram pum huapa lang phak mizo thalaite kan neih zel theih nan Mizoram sawrkar chuan, infrastructure leh thil dangahte theih tawpa NCC te an tawiawm zel tur thu a sawi bawk a. NCC Alumni mi hmingthate bakah State leh National level intihsiakna hrang hranga Mizoram aiawha lawmman latute hnenah lawmpuina leh chawimawina thilpek a hlan nghal bawk a ni.
Vawiin hun hmannaah hian Sports & Youth Services department hotute bakah sipai hotute leh NCC Cadet eng emaw zat an kalkhawm a. NCC Mizoram Girls Under – 17 football final inkhel thlir ho niin Springfield School leh Candid English School NCC Team-te an intum a, Springfield School NCC te hian 2 – 0 a hnehna changin champion no mawi leh tangkafai Rs 70,000 an dawng a ni. Inkhel karlakah hian NCC Cadet ten mizo hnam lam chi hrang hrang an entir bawk. Naktuk January ni 29-ah hian NCC Group Headquarters hawnna inkhawm ‘Ceremonial Raising Programme’ chu MZU Auditorium-ah buatsaih leh tur niin Governor, General Dr. Vijay Kumar Singha’n a hawng dawn a ni.
National Cadet Corps (NCC) hi kum 1948-ah Ministry of Defence hnuaiah din niin, an motto chu ‘Unity & Discipline’ tih a ni a; naupangte’n zirlai an nih lai atanga mahni inthunun theihna an neih theihna tur te, hmahruai kawngah leh ram leh khawtlang tana mi tangkai leh chhawrtlak an nih theihna turtea inchher hriamna niin, Mizoramah chuan kum 1964-ah din tan a ni a, tun dinhmunah Batallion - 4 awmin Aizawlah battalion pathum - 20 Mizoram Bn NCC; 1 Mizoram Bn NCC leh 1 Mizoram Air Sqn NCC te awm mekin, Lungleiah battalion pakhat - 2 Mizoram Bn NCC a awm bawk a ni. School leh college hrang hrangahte NCC unit din niin, High School leh Higher Secondary School zirlai bakah College kal lai, mipa leh hmeichhia, a duh apiangte tan zawm theih a ni.
NCC-a tel thatnate:
NCC hi mahni thiamna leh theihnate tih hmasawnna atan a that mai piah lamah, mahni inthunun theih nan leh intuaihriam nan, sipai nunchan zirna chi hrang hrang - drill, parade, hiking, trekking, map reading, sports leh adventure activities chi hrang hrangte tihpui thin an ni a. Junior Division/Wing (School Cadets) hnuaia kum 2 training kal chhuakte chu 'A' Certificate pek thin niin Senior Division/Wing (College Cadets) hnuaia kum 2 training kal chhuakte chu 'B' Certificate pek an ni leh a, Senior Division-a a kum 3-na training an zawh hnuin 'C' Certificate hlan leh an ni thin. NCC Certificate neite chu Defense Services leh Central Armed Police Forces hrang hrang - CRPF, BSF, SSB, CISF, ITBP, Assam Rifles-ahte hian awlsam zawka an luh theihna tur kawng hawnsak an ni thin a ni.
Tags
News