Tourism Department hotute leh Council of Churches in Mizoram te inhmukhawm

Hnahthial Post | January 20, 2025, Aizawl: Vawiin chawhnu dar 1:00 khan Pu Lalnghinglova Hmar, Minister of State, Tourism Department hovin Tourism Department hotute leh Council of Churches in Mizoram (CCM) aiawhte chuan tunhnai Mizoram tourism chungchang thlirhovin MINECO, Aizawl a SAD Conference Hall II-ah an thukhawm.

Tourism Minister Pu Lalnghinglova Hmar chuan tunhnaiah Mizoram in khualzin a neih zat chu a pun nasat thu sawiin, "September thlaah Sairang thleng rel a lo lut a, a thla leh October thlaah Mizoram a khualzin lo lut zat chu mi sing kua a tling. Mizoram tlawhtu thahnem tak kan nei a, an la pun belh zel kan beisei bawk a, chumi tur pawh chuan Tourism Department lamin hma kan la bawk a ni. Chutihrual chuan kan ram a khualzin rawn pun belh hian nghawng a nei lo thei lova, khualzinte hian kan ram mawina leh nawmna te hmuh a hriat ve an duh a, chuvanga an rawn pun tak zelah chuan engtinnge kan lo dawnsawn ang tih kha ngaihtuah a ngai ta a ni." tiin Mizoram a kohhran hrang hrang hruaitute nena thutkhawm a ngaih chhan a sawi.

Pu Lalnghinglova chuan tourist te chu kan nunphung leh khawsak dan hre sa bik lova lo lut an ni a. Tourism chuan mi zawng zawng a nghawng avangin kohhran leh khawtlang hruaitu te, tlawmngai pawl te nen thawhhona tha tak nei a lo dawnsawn a ngai tih a sawi a. "December thla chhungin district pathum belh tel lovin khualzin mi nuai 1.1 chuang kan nei a, kan ramah hunpui kan hmanlaia lo kal chak te an ni a, nakin zelah pawh hetih hunlai hi khualzin tam hunlai tur a ni. Hei vang hian mipui lamah sensitisation leh awareness uar zawka kalpui zel kan tum. Kan lo dawnsawn dan tur mipuiten kan lo hriatthiam bakah eng chinah nge tihte pawh kan hriat a pawimawh.” a ti a. Biak In chu khualzinte tlawh chak zingah a tel a, Biak In chhunga awmdan tur leh inthuam dan tur thlenga mikhual lamin an hriat theihna tura hmalak dan leh, eng chinah nge an lo tel ang tihte sawiho a pawimawh hle a ni tiin, CCM nena hmalakho dan turte ngaihtuah a tul thu a sawi a ni.

Council of Churches in Mizoram lam pawhin Mizoram a khualzin pung chu lawmawm an tih thu leh Mizoram tlawhtu an pung chuan Kohhran pawh a nghawng tel thu an sawi a. Chuvangin Kohhran anga ngaihtuahna sen a, hma lak tul an tih thu an sawi a ni.

Vawiina thutkhawm hi a bultanna leh sawihawnna huna hman a ni a. Hun remchang hmasaah ngun zawka thawhho dan tur ngaihtuah leh hmalakna awm thei tur hrang hrangte thlirhova thutkhawm leh nise tiin rel a ni. CCM lam pawhin hma lak an duhdan te ngaihtuahin lo thukhawm ve se tiin rel a ni bawk.

Vawiin thutkhawmah ah hian Council of Churches in Mizoram atangin President Rev. Dr. R. Lalbiakliana hovin an tel a. Tourism Department atangin Pi Lalsangpuii Hmar, Joint Secretary; Pi R. Lalrodingi, Director leh official dangte an tel bawk a ni.