Hnahthial Post | February 13, 2026, Aizawl: Vawiin khan Chief Minister Conference Hall-ah Chief Minister Pu Lalduhoma hovin Ministry of Road Transport & Highways hnuaia Mizorama hnathawh mekte enhona (review meeting) neih a ni.
Chief Minister chuan, Minister of Road Transport & Highways Pu Nitin Gadkari hi kan tan a tha em em a, kan dil apiang min tihsak deuh zel thin. Kan hriat angin Vairengte - Aizawl 4 lane-ah pawh entity pahnih hnen zangnadawmna pek min phalsak hial a, hetiang hi hmun dangah a la thleng ngai lo hial ang. A chungah hian kan lawm hle a ni. Ruahtui dawng tam ram kan nih vanga kan kawngpuite rigid pavement tawh zawk tura kan dilna pawh uluk taka an zirchian mek thu min rawn hrilh a ni, a ti.
Meetingah hian Ministry of Road Transport & Highways hnuaia Mizorama hnathawk mekte leh an hnathawhna lama harsatna an tawh hrang hrangte an sawiho a. Nikum September thlaa Chief Minister-in Review Meeting a lo neihpui tawha an thu dah bawhzuina an enho bawk.
MoRTH hnuaiah hian NHIDCL leh PWD ten hna an thawk mek a. NHIDCL project thawh mekte chu:
1. Lunglei - Chhumkhum, 37.42 kms
2. Chhumkhum - Tlabung, 37.53 kms
3. Pawlrang - Rulchawm section of Tuivai - Keipang, 30.41 kms
4. Zorinpui - Longmasu, 28.24 kms
5. Vairengte - Sairang (Package 3 atanga package 8 thleng), 90.11 kms
6. Aizawl bypass pkg 2, 4.6 kms
7. Aizawl bypass pkg 3, 19.3 kms
an ni a. Thawh tan mai tur Aizawl bypass package 1, kilometer 11 a thui a awm a. Project thawh zawh tawh (completed projects) 20 an nei.
Heng an hnathawh meka harsatna an tawhte chipchiar takin an sawi a, a bawhzui dan tur an sawi zel a. National Highway No 2, Aizawl - Tuipang kawng thawh zawh tawha harsatna la awmte pawh sawiin Chief Minister chuan, tuna Arbitrator-a case lut mekte dinhmun hi meeting neih leh hunah chuan kimchang taka report pek theih tawh tur a ni a. Thingfal khuaa kawng laihin a nghawng Biak in, School leh mimal in chhiate umzuina tharlam ber pawh kan hre thei tawh tur a ni, a ti.
Mizoram PWD enkawlte chu:
1. NH 154/6 Assam border - Bilkhawthlir
2. NH 54/6 Sairang - Zemabawk
3. NH 6 Zokhawthar - Champhai
4. NH 150/2 Tuivai - Seling
5. NH 44A/108 Langkaih - Sairang
6. NH 6 (Spur) Bairabi - Mamit
7. NH 306A Vairengte - New Vervek
8. NH 502A Lawngtlai - R. Zocha
9. NH 502 Zero Point - Siaha
te an ni a. Heng an hmalakna hrang hranga thil pawimawhte hi chipchiar takin an sawi a. Sorkar laipuia thlen tur thil pawimawhte an ngaihtuahho bawk.
PWD hian National Highway siamthat hna hmun eng emaw zatah an thawk mek a. Darlak leh Tuidam inkar kawng chu chak zawka bawhzui tura tih a ni.
Chief Minister-in Aizawl Thenzawl Lunglei kawngpui National Highway-a puang tura sorkar laipui a dilna chu Union Home Ministry chuan Aizawl leh Thenzawl chin a rawn pawmpui (recommend) tawh a. MoRTH ngaihchan mek a ni.
PWD Minister kaihhruaina hnuaiah Aizawl khawpui chhung kawngpui siamthat hna a kal mek a. Tun hnai khan district capital 11 kawngpui siamthatna tur sum belh leh an ni.
Hlimena Transport Department ram chu Vehicle Scrapping Centre dah theih tura peih thawkhat a ni tawh a. Vehicle Scrapping kalpui chak hi SASCI atanga lawmman dawn theihna a nih avangin ngaihpawimawh bika neih ni se, an ti.
Meeting-ah hian Pu Vanlalhlana, PWD Minister, Pu Lalthansanga, EF & CC Minister, Pu B. Lalchhanzova, Revenue Minister, PWD officials te, Mizoram sokar official pawhmawhte leh NHIDCL Mizoram Regional Office Executive Director thar Pu Adelbert Susngi te an tel a. Aizawl DC leh Kolasib CALA te a hmunah an tel a, Deputy Commissioner dangten online-in an zawm bawk.
