Hnahthial Post | February 16, 2026, Aizawl: Vawiin khan Gauhati High Court ChiefJustice leh Mizoram State Legal Services Authority Patron-in-Chief ni bawk Justice Ashutosh Kumar chuan Gauhati High Court Aizawl Bench Conference Hall, MINECO-ah Mizoram State Legal Services Authority huaihawt ni khat awh, environment kaihhnawih dan chi rhang hrang leh Pollution leh a nghawng tha lote zir chianna, ‘One day Seminar on various Provisions of Environmental Laws and the Harmful Impacts of pollution and environmental degradation’ chu khuallian niin a hawng.
Hawnna hunah hian khuallian Justice Ashutosh Kumar, Chief Justice, Gauhati High Court chuan thusawiin, khawvel pum huap pawha thupui pawimawh tak ngaihtuahho tura Seminar buatsaih a nih chu lawmawm a tih thu a sawi a. Kan chenna khawvel chu kan rochun ni lova kan hnua lo la awm zel turte ta kan hawh a ni tih sawiin, environment humhalhna atana Movement ropui tak tak Chipko Movement leh Kerala State-a Silent Valley humhalhna tura movement-chungchang te a tarlang a. India ram Danpui Article 21, 48 leh 51-ahte pawh environment humhalh leh environment thianghlim tak neih chu mi tin mawhphurhna leh chanvo a nihzia tarlan a ni tih sawiin, Judiciary ang pawhin Doctrine of Absolute Trust hnuaia environment humhalh chu mi tin mawhphurhna a nih dan te leh Precautionary Principles-te chu theihtawp chhuaha Judiciary-in environment humhalh a tumna a ni tih a sawi a. Ngaihtuahna zau tak seng chungin Seminar chu hlawk taka hmang turin kalkhawmte chu duhsakna a hlan nghal bawk a ni.
Seminar-ah hian Dr. Lalramnghaki Pachuau Scientist(C), MPCB hnen atangin India ram pum leh Mizoram anga tun dinhmuna pollution leh tun hnua a nghawng theih chi hrang hrangte ngaihthlak niin,sawihona neih chhunzawm nghal a ni a. Dr. Shantanu Dutta, Regional Director, Central Pollution Control Board chuan environment humhalh kawnga dan ken kawhna leh chumiin a nghawng mipuite dinhmun tih thupui hmangin zirtirna a pe a. Thupui hrang hrangte sawihona neih leh a nih hnuah Pi Lucy NgurkhumiSailo, Scientist MPCB leh Pu Lalventluanga, Office Secretary, EFCC Dept. ten Seminar tlangpui khaikhawmna an nei a ni.
Hawnna hun hi Justice Nelson Sailo, Judge,Gauhati High Court, Mizoram State Legal Services Authority Executive Chairman ni bawk chuan kaihruaiin, kalkhawmte lawmna thu a sawi a. Justice Michael Zothankhuma, Judge GHC chuan environment humhalh pawimawhna leh chumi kaihhnawiha High Court leh Supreme Court hmalakna hrang hrangte bakah mipui chanvote a sawifiah a. Dr. HTC Lalrinchhana Registrar, GHC (AB) leh Secretary, High Court Legal Services Committee ni bawk chuan lawmthu sawiin hawnna hun hi a kar a ni.
Tags
News