International Condom Day 2026 hmang

Hnahthial Post | February 13, 2026, Aizawl: February ni 13 hi International Condom Day a ni a, hehe ni denchhen hian Mizoram State AIDS Control Society (MSACS) leh AIDS Healthcare Foundation (AHF) India Cares te buatsaihin Dawrpui Multi-Purpose Hall, Aizawl ah hun hman a ni. Kumin International Condom Day thupui atan hian ‘Just Use It’ tih hman a ni.

International Condom Day, 2026 puala hun hmanna hi Pi Zuiliani Hrahsel, Joint Director (IEC) MSACS-in a kaihruai a, Pi Lalrinpuii, Minister, Health & Family Welfare Department, Government of Mizoram chu khuallian niin hun a hmanpui a ni.

Khuallian, Pi Lalrinpuii, Health Minister chuan Mizoram ah sex atanga HIV kai kan pung zel chu a ngaimawh thu leh hnam ang pawha mualphona a nih thu a sawi a, World Health Organization (WHO) pawhin Condom chu HIV leh sex atanga inkaichhawn theih natna darh zel tur venna awlsam leh tangkai ber pakhat a nih thu an tarlan angin, kan ramah pawh Condom chungchanga kan ngaihdan leh rinthu diklo kan neih thinte kan paihbo a, a hman dan tur leh a nihna ang taka Condom hi hman a nih chuan HIV leh sex atanga inkaichhawn theih natna tam tak darh tur nasa taka kan ven theih a beisei tlat thu a sawi a ni.

India ram HIV prevalence rate hi 0.2 ani a, mahse Mizoram HIV prevalence rate hi 2.74 a ni hi a zahthlak a ni. Theihtawp kan chhuah a ngaih thu uar takin a sawi.

Mizoramah mahni kawppuite laka rinawm lo an tam chu pawi a tih thu leh kan rinna nen pawh a inhmeh loh thu a sawi bawk a, hei hi HIV kan rama darh zel nachhan lian tak pakhat a nih thu sawiin kawppui lakah rinawm turin Zoram mipuite a chah. Chutih rualin thalaite nupui pasal neih hma a sex hmang lo tur leh a thei ngang lote chu condom hmang hreh lo turin a chah zui bawk.

HIV kaina tam ber chu sex atang a nih thu sawiin, za a sawmsarih (70%) lai a nih thu a tarlang a, Mizoram future veng tur hian kan thalaitean pawimawh hle tih uar takin a sawi. Sex atanga HIV/AIDS a darh zel loh nan leh kan lo hrisel zel theih nan “Just use it” tih hi hre reng turin International Condom Day a kalkhawmte a chah a ni.

International Condom Day hmannaah hian khuallian, Pi Lalrinpuii, Health Minister chuan Love Brigade 2.0 Campaign hawnna hun a hmang a, Love Brigade 2.0 Campaign hnuaiah hian Two-Wheeler Taxi khalhtute hnenah Condom pai theihna tur Love Brigade Condom Jacket sem a ni. Condom Jacket chu passenger leh a mamawh apiang ten Condom-an lak theihna atana tangkai taka hmang turin a chah a ni.

International Condom Day, 2026 hmannaah hian Dr. V. Sam Prasad, Country Program Director, AHF India Cares chuan Love Brigade 2.0 Campaign kalpui dan chungchang sawina hun a hmang a, HIV leh sex atanga inkaichhawn theih natna hi invenna ngaihthahna apiangah a hluar thin thu sawiin, Sex atanga HIV darh zel tur venna atan Condom chungchanga kan ngaihdan dik lote dah bo a, a mamawh apiang ten awlsam taka Condom an neih theih dan tur ruahmanna siam leh Condom tel lova sex hman loh kan ngaihpawimawh a tul thu a sawi.

International Condom Day, 2026 pual hian February ni 12, 2026 khan Two-Wheeler Taxi hmangtu mipuiten awlsam zawka Condom an lak theihna turinTwo-Wheeler Taxi khalhtute hnenah Condom pai theihna tur Love Brigade Condom Jacket sem a ni a, Condom Jacket semchhuahna hun hi Aizawl Two-Wheeler Taxi Association (ATTA) hruaituten an hmanpui bawk a ni.