Hnahthial Post | February 13, 2026, Aizawl: Vawiin khan Chief Minister Pu Lalduhoma hovin a office-ah Thenzawl Peace City Master Plan siam mek chu thlirho a ni.
Peace City huam chhung kilometer sawmruk (60 sqkms) a zauah ram bial hrang hrang thliarin chung ram bial (zone) te hmanna tur ruahmannate chu an en a. Mihring chenna tur bial te, sumdawnna hmun tur te, zirna hmun tur te, Health Facility awmna hmun tur te, Green Park chin tur te leh Sports Complex hmun tur te a biala ruahman an ni a. Industrial Hub tur pawh riruan a ni bawk. Heng bial chhunga hmunhma dah turte dah dan tur (plan) hi ruahman zui leh tur a ni ang.
Master plan ruahman tawh china siamthat ngai nia langte pawh vawiin hian an sawiho nghal a ni.
Thenzawl Peace City lailia awm turin Greenfield City project proposal SASCI atanga thawh tura thehluh mek a ni a. He proposal hi pawm a nih chuan hma lak nghal mai theih a ni ang.
Meeting-ah hian Pu K. Sapdanga, UD & PA Minister, Pu Vanlaldina Fanai, Commissioner & Secretary to CM, Pu Lalmalsawma Pachuau, Secretary, UD&PA, Pi R. Lalrodingi, OSD to CM, Master Plan siamtu IPE Global hotute leh sorkar officials dangte an tel a ni.
Tags
News