Hnahthial Post | February 13, 2026, Aizawl: Vawiin chawhnu dar 2:00 khan Pu Lalnghinglova Hmar, Minister of State leh Aizawl West II Assembly Constituency bialtu MLA ni bawk chuan a bial chhung atanga Mizoram Civil Services (Combined Competitive) Examination 2025 a tlingte leh zirlai hlawhtling lawmpuina hun MINECO-a a office-ah a hmanpui.
Aizawl West II AC atang hian Mizoram Civil Services (Combined Competitive) Examination 2025-ah John Hualhmingthanga s/o Hualchungnunga, Dinthar Veng chu Mizoram Information Service (MIS) ah a tling a; KD Lalthiamsama s/o K. Thangchungnunga, Tuikual South leh Lalchhanhima s/o Rosangzuala, Tuikual North-te chu Mizoram Police Service (MPS) an tling bawk. Combined Competitive Exam-a tlingte hi lawmpuina memento leh pawisa fai Rs. 20,000/ theuh hlan an ni.
Anni bakah hian Lalthatluangi d/o Lalrotluanga, Dawrpui Vengthar chu Mizoram University hnuaia Bachelor of Vocation (Interior Design)-ah pathumna niin memento leh Rs. 10,000/- hlan a ni bawk.
Minister Pu Lalnghinglova Hmar chuan, "Aizawl West II atangin tun hnaiah exam result chhuak apiangin lawmpui tur kan nei thei zel hi a lawmawm tak zet a. Civil services exam a hlawhtling leh zirlai hlawhtling lawmpui tur kan nei zel hi khawtlang tan pawha thil hlu leh lawmawm tak a ni a. A hminga bialtu MLA nih pawh a tinuam hle a ni." tiin a lawmpui thu a sawi.
Pu Tetea Hmar hian a lawmpuite hi fuih bawkin, "Hna thiam leh mi fel zel hi hriat hlawh an ni a, chuvangin kan kalna line-ah theuh hna thiam tak nih tum a pawimawh a, hei hian in kal zelnaah pawh thui tak a nghawng dawn a ni." a ti.
Vawiina lawmpuina hunah hian zirlai hlawhtlingte hi an chhungten an tawiawm a ni.
Tags
News