Health & Social Welfare Minister Pi Lalrinpuii'n Central Sawrkar Ministry hrang hrang dawr

Hnahthial Post | February 11, 2026, Aizawl: Nimin ni 10.2.2026 (Tuesday) khan Health & Family Welfare leh Social Welfare Department changtu Minister, Pi Lalrinpuii chuan Central Sawrkar a Union Minister hrang hrang leh officials te chu Delhi ah a hmu a.

Union Minister, Ministry of Women & Child Development - Pi Annpurna Devi, Union Minister, Women & Child Development Department chu a office ah hmu in, Mizoram atanga Nu leh naupang chawikanna project hrang hrang thehluh te chungchang a sawipui a. Hmun hrang hranga Anganwadi Centre building chhe lutuk sak thatna tur proposal te leh Hmeichhe hamthatna tura project a thehluh hrang hrangte chu tun financial year tawp hma a ngei a sanction sak turin a ngen a, Union Minister chuan a theih ang ang a tihhlawhtlin ngei a tum thu a lo hrilh a ni.

Union Minister of State, Ministry of Ayush - Prataprao Jadav nen inkawmna hun tha tak nei lehin, Mizoram chhung hmu hrang hranga 10 bedded Hospital siam belhna tur ruahmanna te sawi pui in, Pu Pratap Rao a hian 10 Bedded Hospital, Hortoki a Siam tur chu supplementary action plan a telh a, pawmpui dan kawng lo zawn sak ngei a tum bakah 10 bedded Hospital dang 3 pawh Sawrkar kumthar lamah hmalak dan kawng zawn a tum thu Health Minister hi a lo hrilh a ni. Tin, Ayush hnuaia 10 bedded Hospital kan neih mek hnuaia thawktute hlawh min tumsak thin pawh kum thar lam atan pawh a min tum sak zui leh a lo remtih sak bawk.

Hemi hnu hian Upate pension chungchang ah a enkawltu ber Senior Economic Advisor, Ministry of Rural Development - Pi Kalyani Mishra chu a office ah kawm lehin, Upate pension chungchanga harsatna hrang hrangte an sawi dun a..SNA Sparsh avanga central lamin upa pension an release theih loh reng chu an chinfel tep tawh thu Economics Adviser hian lo hrilh in, SNA Sparsh a fel hnu chuan a rang thei ang bera release zel an tum thu a lo hrilh bawk.

Nimin vek khan Pi Lalrinpuii leh Asian Development Bank, a Country Director - Pu Mio Oka te chuan ADB India Residence Mission Office, Delhi ah inkawmna an nei a. Tun hnaia Asian Development Bank in Mizoram Sawrkar Flagship Programme - Universal Health Care Scheme kalpuina atana Externally Aided Loan pek an rawn remtih chungchangah thawhhona tha neih chhohzel theih dan tur kawng te sawi tlang in, tihtur hmachhawp hrang hrangte an sawi ho a. Mizoram in tunhnai maiah World Bank Project - MHSSP Project chu hlawhtling taka kan kalpui thu leh hemi avanga Mizoram Sawrkar chu thawhpui chhunzawm zel an chak thu sawiin, Pi rinpuii chuan, ADB loan project pawh hi hlawhtling taka kalpui a nih ngei a beisei thu a sawi a.

ADB lam pawhin theihtawp chhuah an lo tum dan te, rang taka loan pek chhuah anih theih nana hmalak an tum thu te lo sawiin, tihtur hrang hrang te tha taka hlenchhuah zel anih chuan hlawhtling taka he project hi kalpui anih ngei an beisei thu an lo sawi ve bawk a ni.

Hon'ble Minister - Pi Lalrinpuii hi Pi K. Lalrinzuali, IAS, Commissioner & Secretary, Health & Family Welfare, Dr Mara S Thansiami, Mission Director, NAM, Dr Hmingthankimi,OSD, NHM leh Pu H. Lalhruaitluanga, PS to Minister ten an tawiawm a ni.