Leimin tur hriat theihna atana warning pe chhuak thei khawl Early Landslide Realtime Monitoring System entirna nei

Hnahthial Post | February 11, 2026, Aizawl: Vawiin khan DM&R Minister Prof. Lalnilawma hmaah Leimin tur hriatlawk theihna atana Warning pe chhuak thei (Early Landslide Realtime Monitoring System) khawl prototype demonstration neih a ni. He khawl hmang hian leimin mai theite a hriat zung zung theih dawn bakah Controling Center-ah leh a bul hnaia mite hnenah warning a pe chhuak thei tura beisei a ni.

He khawl hian rang takin 0.5 seconds lek chhungin realtime data cloud ah a thawn anga, chu chuan warning system a hmantutecontrol center ah a pe dawn a ni. Lei min thlen theitu (factor) hrang hrang atangin sensors transducer hman a ni a; information data base a keng tel nghal a, webservice bakah, direct realtime alert phone call leh sms a thawn nghal thei bawk a ni ( multiple user hnenah). Hei bakah hian point to point communication protocol hmangin internet leh mobile data a down pawhin sensor reading leh alert a la thawn chhuak zel thei bawk a ni. He device hian solar panel, leh grid supply a hmang kawp thei a, remote area ah pawh awlsam taka install theih a ni.

DM&R Minister Prof. Lalnilawma hi Pu Udit Prakash Rai, IAS, Commissioner & Secretary leh Pu Chuauhnuna, Director, DM&R ten an tawiawm a ni.

Prototype Demonstration petute chu -

Prof. Laldinpuia (Department of Disaster Management, MZU), Dr. Morrel VL. Nunsanga (Department of Information Technology, MZU), Dr. Reginald H. Vanlalchaka (Department of Electronics, Government Zirtiri Residential Science College), Er. Lalngaihzuala te an ni.