Hnahthial Post | February 12, 2025, Lunglei: Lunglei South bialtu MLA Pu Lalramliana Papuia chuan ni tha chakna hmanga Lunglei Home TNT chawm tura SELCO Foundation te'n Solar Power khawl an bun thar, "Fully Solar Powered Lunglei Home TNT" chu nimin khan a hawng.
Pu Lalramliana Papuia chuan Pathian leh ram rawngbawlnaah Pathian duh zawng ngaih pawimawh hmasak a ṭul tih sawiin, TNT Home pawh Pathian duh zawng rawngbawlna hmun a nih angin an mamawh Pathianin a pe zel tih a sawi a. SELCO Foundation te hma lakna chu lawmawm a tih thu leh ropui a tih thu sawiin, chhunzawm zel turin a chah a. Mahni theihna zawn ṭheuhva mi dangte tana malsawmna nih chu mihring dam chhan leh khawvel nuam zawk a awm theih nana thil pawimawh a nih thu sawiin, ram, khawtlang leh mi dangte tana ṭangkai nih tum ṭheuh turin kal khawmte a chah.
Lunglei Home TNT Secretary Pu C. Lalbiaknunga'n inlawmna thu a sawi a. SELCO Foundation State Lead Pu Lalnuntluanga Colney chuan technical report pein, TNT-a Solar Power an bun chu 5KW a nih thu leh a bunna senso ₹80,000/- a nih thu a sawi.
Lunglei Home TNT Director Pu Lalramnghinglova chuan an mamawh solar power an nei thei ta chu lawmawm an tih thu sawiin, bialtu MLA, SELCO Foundation leh anmahni duhsaka ṭanpui ṭhintute chungah lawm thu a sawi a. Mi 768 awmna TNT Lunglei chuan kawlphetha an mamawhna a san thu sawiin, solar power bun thar chu chhum lo chat lovin, ṭangkai takin an hmang tih a sawi.
Fully Solar Powered Lunglei Home TNT hawnnaah hian MLA Pu Lalramliana Papuia hi Lunglei Municipal Council (LMC) Executive Councillor Pu Zorinsanga Hmar, Ward No. X Councillor Pi Judy Lalhriatpuii leh political party hruaitute'n an ṭawiawm.
Tags
News