FCS&CA Minister hovin City Gas Distribution (CGD) chungchang inhrilhhriatna neih a ni

Hnahthial Post | February 12, 2026, Aizawl: Vawiin khan Pu B. Lalchhanzova, Minister, Food, Civil Supplies & Consumer Affairs (FCS&CA) chuan ATI Auditorium, MINECO-ah Tripura Natural Gas Company Limited (TNGCL) leh FCS&CA tangkawp buatsaih, pipe hmanga gas semchhuah dan tur chungchang inhrilhhriatna, ‘Sensitization Workshop on City Gas Distribution (CGD)’ chu khuallian niin a hmanpui.

Khuallian Pu B. Lalchhanzova chuan thu sawiin, January thlaa Gas Pipe hmanga Tripura atanga Mizorama Natural Gas thlunzawm hna thawh endika Agartala a tlawh tuma TNGCL lamin an lo thlen dan atangin mikhual laka thatna zir theih a tam hle thu te, Tripura-ah chuan kum 30 chuang Piped Natural Gas (PNG) hman a nih tawh thu leh mi 60000 chuangin an hman mek thu a sawi a. Ram dangah chuan domestic mai ni lova motor-ah te pawh Compressed Natural Gas (CNG) anga hman thin a ni tih leh hotel leh restaurant hmanga eizawngte tan pawh sum sen a tlahniam ang a, Mizo economy hmel a tidanglawm dawn tih a sawi a. March 2027-a Indradhanush Gas Grid Limited (IGGL)-te’n Sihhmui thleng gas pipeline an phum thlen hnua TNGCL-in Aizawl leh Mamit-a Piped Natural Gas (PNG) hman tura an thlun tur chu 2028 kum tir chhova Mizo mipuite’n an hman tan theih beisei chunga hmalak lawk theih ang ang a rang lama bawhzui tan tura a beih thu a sawi bawk.

Minister chuan he hmasawnna lo thleng mai tur atana mipuite lo puahchah lawk nan an zawhna leh rinhlelhna neihte chhansak turin he workshop hi buatsaih a ni, a ti a. MizoraminIndia rama state dangte leh hnam dangte nena inpawhna thuk zawk a neih theih nan Mizo mipuite’n state dang leh ram dang tlawhpawhin kan thiamnate kan phochhuak tur a ni a, khual tha chhawn danah leh inlaichinna tha siam kawngah tan kan la tur a ni, a ti a. Pipe hmanga gas semchhuah hmalaknaah hian kalkhawmte chu Mizoram hmasawnna atana an thawhpuite an nih thu sawiin, mipui awareness pek lamah pawh theihtawpa tan lakpui turin a sawm a ni.

Pu Pralay Patra, Managing Director, TNGCL chu khualzahawm niin, thusawina hun a hmang a. Kalkhawmte chu natural gas chungchang te, kan khawvel boruak chhe zual zel leh lum tulh tulhah natural gas hman a that zawk thu te, India sawrkar laipui chuan kum 2030 hmain energy source 15% chu natural gas nihtir a tum tih thute a sawi a. He hmasawnna hi sumdawnna mai ni lovin khawvel boruak chhe zel tur dalna pakhat a ni, tih a sawi a ni.

Vawiin workshop-ah hian TNGCL atangin an Managing Director bakah hian Pu SC Reang, Director (Commercial) leh an engineer-te an tel a. Sawrkar department hrang hrang aiawh te, IGGL, MCU, Aizawl Local Council Association, AMFU, CYMA, MHIP, MUP, MZP, MSU, Mizo Youtubers Association, FCI, BSNL, SBI, AMPEDA, MIDA, Mizoram Merchant Association, Mizoram Journalist Association (MJA), Govt. Mizoram Law College Consumer Club, Mizoram Industries Owner Association leh social activist te an tel bawk a.

Pi C. Lalramthangi’n kaihruaiin, Pi Teresy Vanlalhruaii, Secretary, FCS&CA-in kalkhawmte lawmna thu a sawi a. Project kalhmang leh hnathawh dante tarlangin, IGGL pipe phum hna thawh mekah welding 52% leh lowering 40% zawh a nih tawh thu a sawi a. TNGCL atanga presentation ngaihthlak a nih hnuah mipui zawhna chhanna hun hman niin, Pi Saizikpuii, Director, FCS&CA chuan lawmthu sawiin hun a khar a ni.

TNGCL presentation atanga hmuh danin Government of India (Petroleum and Natural Gas Regulatory Board) chuan uar zawka natural gas hman a nih theihna tura India state (Andaman & Nicobar Islands leh Lakshadweep tih loh) hrang hrangah City Gas Distribution Network siam nan entity hrang hrang hnenah thuneihna a pe tawh a. TNGCL hian Mizoram leh Manipur a chang a ni.

Natural Gas Pipeline hi Panisagar Terminal, Tripura atanga intan niin Sihhmui, Mizoram-ah Receiving Terminal bun a ni dawn a. Panisagar leh Sihhmui (Mizoram) inkar pipe thui zawng hi Km 119.5 niin Pipe diameter hi feet 1 a ni a, leimin leh shock laka him tur pipe hman niin pipeline hian Kanhmun, Zawlnuam, Kawrthah, Tuidam, Darlak, Mamit, Lengte te a paltlang dawn a; Panisagar - Sihhmui inkara Pipe phum hna hi Indradhanush Gas Grid Limited (IGGL) ten thawkin, Sihhmui Terminal atanga Aizawl khawpui chhunga gas sem darh leh enkawlzui hna chu Tripura Natural Gas Company Limited (TNGCL) ten an chang ve thung dawn a ni. Aizawl khawpui bakah hian Mizoram hmun hrang hrangah a tahtawla la semdarh zel tura ruahman a ni bawk.

He Tripura - Mizoram Gas Pipeline Project hi North East Natural Gas Pipeline Grid hnuaia mi niin, kum 2027 December thla velah thawh zawh hman beisei a ni a, tun dinhmunah 45% vel thawh zawh tawh a nih thu IGGL hotute chuan an sawi a ni.