Sports Minister-in Muaythai National Championship medal late lawmpui

Hnahthial Post | February 12, 2026, Aizawl: Nimin chawhnu dar 3 khan Pu Lalnghinglova Hmar, Minister of State, Sports & Youth Services Department chuan 7th Senior National Muaythai Championship 2026 neih zawh taka Mizoram tana medal 12 late chu MINECO a a office-ah lawmpuina hun a hmanpui.

India rama Muaythai inelna sang hi January 22-25, 2026 khan Hyderabad, Telangana-ah neih a ni a. Hetah hian Mizoram in player 11 tirin mi 10 in inelna hrang hrangah medal 12 - gold medal panga, silver medal pathum leh bronze medal pali an la a ni.

Sports Minister Pu Lalnghinglova Hmar chuan, "National Championship a medal late leh tel ho zawng zawng ka lawmpui a, Senior National Championship-ah hetiang zat han lak theih hi a lawmawm tak zet a ni." tiin lawmpuina thu a sawi a. "Incentive Cash Award dawng thei zingah in tel tawh a, tunah chuan hmalam in pan zelnaah pawh in lawmman chu in kutah a innghat tawh a ni." a ti.

Minister chuan sawi belhin, "Mizoram tana medal lak theihna nei infiammite hi mi hriat hlawh lo an ni fo thin a, mahse national level leh a bak zelah medal la thei tura beiseina nei an nih avangin kan thlurbing ang." a ti a. Minister hian medal late hi National Games atana an inbuatsaihna turin Muaythai Association of Mizoram hnenah hian cheng nuai thum pek an nih tur thu a sawi bawk a. "Vawiin a lawmpuina kan inpek hi chu a hminga kan inlawmpui tih lantirna mai a ni a. Lawmman tak tak chu Incentive Cash Award sem hunah in la dawn a ni." a ti bawk.

He lawmpuina hunah hian Muaythai Association of Mizoram lam atangin report bakah an hmabakte leh hmasawnna atana an mamawhte ngaihthlak a ni a. Sports & Youth Services Department atangin Pu Dolianbuaia, Joint Secretary chuan thu sawi bawkin, "Mizo infiammiten medal kan lak hnuah inthlahdahna hun kan nei lova, a aia sang zawkah medal la leh thei tura kan tan mar a tul" a ti a, kan thlen chin a san ang zelin kan elpuite pawh an sang zel tih hriat a pawimawh thu a sawi.

Lawmpuina hunah hian Sports & Youth Services Department atangin Commissioner & Secretary Pu V. Lalsangliana pawh a tel a, Mizoram State Sports Council atangin official pawimawhte bakah Mizoram Muaythai Association hotute an tel bawk a ni.