Hnahthial Post | February 17, 2026, Aizawl: Prof. Lalnilawma, Minister, Rural Development & Administration Department, etc. chuan vawiin khan MINECO-a Open Gym bulah Mizoram State Rural Livelihoods Mission (MzSRLM) leh RD&AD-te buatsaih, RD Block 12 (Lungsen, Aibawk, Khawbung, Tlangnuam, Lunglei, Kawrtethawveng, Zawlnuam, East Lungdar, Sangau, Thingsulthliah, Reiek leh West Phaileng)-a Self Help Group (SHG) member-te hman tur, MzSRLM scheme enkawl pakhat, Aajeevika Grameen Yojana Express (AGEY) hnuaia lirthei 19 (Mahindra Pik Up 17 leh Maruti Super Carry 2) hlanna leh vai liamna hun chu khuallian niin a hmanpui.
.jpeg)
Khuallian Prof. Lalnilawma chuan SHG member-te hnena lirthei chabi a hlan hnuin thu a sawi a. A hun tawn tawh zinga lawmawm ber pawl a nih thu sawiin, hetiang ti thei dinhmuna an awm chu ropui a ti a, MzSRLM tan tirh hunlai a mitthlaah a awm thu a sawi a. Mizoram University-a a thawh laiin state sawrkarin MzSRLM kalphung zir tura a sawmte zingah a tel a, Andhra Pradesh-a SHG nuho a kawm thu leh chutih laia Mizo nuho zingah mahni ro inrel a, ruahmanna siam a, mahni eizawnnaa hma la thei an awm hun a nghahhlelh thin thu leh 2013 atanga bultan chu kum 10 chuang a liam hnu chuan SHG-te’n thil siamchhuah lama hmasawnna an ngah thu a sawi a. Department lam an tang a, MzSRLM pawh a kal dan an sawi dang hret hret a, hotute an phur ang bawkin SHG nuho an phur a pawimawh a ni, a ti.
.jpeg)
Minister chuan Department hmalaknate tarlangin, Ropuiliani Women Farmer Producer Company kaltlangin SHG thil tharchhuahte phaiah an thawn thla a, hralhna tur (market) an zawng zel tih a sawi a. Prime Minister-in a ngaih pawimawh em em, ‘Lakhpati Didi’ ni thei tura kum khata nuai 1 tal la lut turin nuho chet chhuah a ngaih thu a sawi a. Ni za inhlawhna leh eizawnna thlunzawm tura hma lak a ni tih sawiin, RD block tin atangin presentation an nei a, an feh kawng tur siam chhoh zel tum a ni, a ti a. ‘Selhel’ brand hmangin SHG thil tharte an zuar chhuak dawn a, ama office-ah ngei pawh he’ng thilte hi a dahna a siama a phochhuah thu a sawi a. Champhaia ‘SEL HEL Dawr’ awm chuan mit a la tiin, hmun remchang apiangah design inanga hetiang ‘SEL HEL Dawr’ hi hawn tum a ni, a ti bawk.
.jpeg)
Prof. Lalnilawma chuan SHG member lirthei dawngte chu an mawhphurhna a san thu hrilhin, a rulh dan tur ngaihtuah tel a, an lirthei dawnte uluk taka enkawl a, insurance leh pollution test-te a hun taka tifel turin a chah a. A thusawi zawh hian Minister chuan tangkai taka nuho leh an awmna khawtlang leh chhehvel khaw mipuite’n an hman theih nan lirtheite chu a vai liam a ni.
.jpeg)
AGEY lirthei vai liamna hun hi Pu R. Zarzosanga, State Mission Director, MzSRLM/Commissioner & Secretary, RD&AD-in kaihruaiin, Pi Zosangzuali Pachuau, CEO, MzSRLM atangin lirthei semchhuah chungchang leh AGEY hnuaia hmalaknate report ngaihthlak a ni a. Kum 2017 – 2018 khan MzSRLM chuan AGEY hnuaiah block 12 hnenah lirthei 48 a lo pe chhuak tawh tih a tarlang a. State Institute of Rural Development & Panchayati Raj (SIRD&PR) Mizoram chuan AGEY hnuaia Mizoram hnathawh that dan an zirchianna report, ‘Process Evaluation of AGEY’ an thehlut tawh a, AGEY enkawlna lama hmasawn zel nan MzSRLM chuan an bawhzui dawn a ni, a ti a. Lirthei hi a thlawna inpek a ni lo tih sawiin, SHG member-te chu thahnemngai taka rul leh ngei turin a chah a ni.
.jpeg)
Aajeevika Grameen Express Yojana (AGEY) hi August 2017 atanga hman tan niin, DAY-NRLM hnuaia sub-scheme a ni a. AGEY-in a tum ber chu thingtlanga awm SHG member-te sum lakluhna hmanrua tur, khaw mipuite’n tangkai taka bazar, zirna in, leh damdawi in kalna atana hman tur leh khaw chhehvel ei leh bar hmasawnna thlen thei tur lirthei ruahmansak a ni a. He programme hnuaiah hian MzSRLM atangin Cluster Level Federation (CLF)-te hnenah AGEY atana hman tur sum pek niin, pung awm lovin SHG member-te hian lirthei lei nan pukin, kum ruk chhungin an rul zo leh tur a ni.
.jpeg)
.jpeg)
.jpeg)
.jpeg)
.jpeg)
.jpeg)
.jpeg)
.jpeg)
.jpeg)
.jpeg)
.jpeg)
.jpeg)
.jpeg)
.jpeg)
.jpeg)
.jpeg)
.jpeg)
.jpeg)
.jpeg)
.jpeg)
.jpeg)
.jpeg)
Tags
News