Hnahthial Post | February 2, 2026, Aizawl: Pu Lalnghinglova Hmar, Minister of State, Sports & Youth Services Department chuan vawiin chawhnu khan tunhnaia 2026 SAFF Futsal Championship khelh zawh taka silver medal latu India team-a tel Mizo futsal player parukte chu MINECO-a a office chamber-ah lawmpuina hun a hmanpui.
South Asian Football Federation buatsaih futsal inelna hi January 14 atanga 26, 2026 chhung khan Thailand-ah neih a ni a, a vawikhatna a ni nghe nghe. India squad-ah player 14 koh niin heng zinga paruk lai chu Mizo an ni. India hian match ruk atangin vawi thum hnehna changin vawi hnih draw result an nei a, a pumpuiah pahnihna an ni.
Sports Minister Pu Lalnghinglova chuan, "India team-ah Mizo thalai paruk an tel hi a lawmawm hle a, international a nih tawh hi chuan eng thilah pawh kawng a awlsam tawh ngai lo. Mizo player hetiang zat India team-a kan tel thei leh, India team in silver medal a la thei hian Mizo zingah theihna sang a awm tih a tilang a, theihtawp kan chhuah zel a tangkai dawn a, a pawimawh." tiin a sawi. Player-te chu fuih bawkin, "A bul tantu in ni. Tunah chuan a kawng hawngtu in ni tawh a, hmahruaitu in nih chhunzawm zel a pawimawh hle." a ti bawk.
Pu Lalnghinglova Hmar chuan sawi chhunzawmin, "MFA Futsal Committee te hmalakna leh inpekna a fakawm hle. Sorkar atangin inpuihna tam tak inpek tur a awm lova, anni in theihtawp chhuahin hma an la thin a ni. Tun thlengin Mizoramah futsal inelna mumal tak a awm a, kan thlen chin pawh a sang ve hret hret zel." a ti.
Minister hian India team-a tel Mizo player-te hi Mizoram Sports Incentive Cash Award sem leh hunah an tel ve theih tur thu a sawi bawk.
Lawmpuina hunah hian Mizo player-te atangin inelna report ngaihthlak niin, MFA Futsal Committee lam atanga thusawi a ni bawk. He hunah hian player-te bakah MFA Futsal Committee leh player-te tawiawmtu an chhungte an tel.
India national futsal team a Mizo player telte:
1. Jonathan Lalrawngbawla, Zotlang, Aizawl.
2. Vincent Laltluangzela, Tlangnuam, Aizawl.
3. H. Lalrinzuala, Electric veng, Aizawl
4. K. Roluahpuia, Tuikhuahtlang, Aizawl
5. Lalsangkima, Electric veng, Aizawl
6. Lalsawmpuia, Electric veng, Aizawl
