BCM rorelna sang ber Assembly vawi 130-na rorelna ni hnuhnung ber zawh a ni; Baptist Higher Secondary School Hnahthialah din pawm a ni

Hnahthial Post | March 8, 2026, Aizawl: Baptist Church of Mizoram rorelna sang ber BCM Assembly chu BCM Biak In Bazar Veng Lunglei-ah, March ni 4 - 8, 2026 chhungin neih a ni a. Assembly thupui atan "Dak ula lote en rawh u" (Johana 4:35) tih a ni.

March 4, 2026 (Nilaini) zanah Assembly hawnna inkhawm neih a ni a. Rev. Dr. C. Vanlaldika President-in inkhawm a kai hruai a, Assembly hawnna a nei nghal. Rev. Laltanpuia Colney-in “Pathian ram tulna” tih thupui hmangin thupui sawi hawnna a nei.

March 5, 2026 (Ningani) Chawhma dar 10:00 ah Assembly rorel ni hmasa ber neih tan a ni a, Rev. Dr. C. Vanlaldika’n Assembly rorel bul tanin, rorel palai lawmna thu a sawi zawhah President thar Rev. Prof. R. Zolawma hnenah President nihna a hlan, ani hian rorel a kaihruai nghal a, palai lawmna a bul tanin rorel ni hmasa ber neih chhunzawm nghal a ni.

Kum 2025 Assembly leh 2026 Assembly inkara Ordained Pastor 5 leh kohhran Upa 72, an vaiin mi 77 sun an ni, an rawngbawlna avanga lawmthu sawina leh an kalsan tak kohhran hote leh an chhungte tana tawngtaisakna Rev. R. Lalrintluanga AGS (Mission)in a hmang.

Statistician Report-in a lan danin Mizoram Baptist Kohhran hnuaiah member 1,86,772 awmin, kum hmasa aia member punna chu 2,332 a ni. BCM hnuai-ah hian ABC 17, Pastor Bial 95 leh Tualchhung Kohhran 711 an awm a ni.

AGS – Mission Report chuan Mission Field-19 leh station hrang hrang 7 -ah rawng bawl mek a nih thu te, Missionary leh Mission hnuaiah thawktu mi 1350 an awm thu te, kum 2025-2026 chhungin Kohhran thar 31 leh Fellowship 18 dinin, ringthar 5063 an awm thu a tarlang bawk.

President Elect leh Statistician thlanna neih a ni a, President Elect atan Rev. Dr. R. Lalthanmawia Aizawl Central Bial thlan niin, Statistician atan Upa Dr. Lallianzuala Hnamte Electric veng Aizawl thlan a ni bawk.

𝐆𝐞𝐧𝐞𝐫𝐚𝐥 𝐒𝐞𝐜𝐫𝐞𝐭𝐚𝐫𝐲-𝐢𝐧 𝐀𝐬𝐬𝐞𝐦𝐛𝐥𝐲 𝐄𝐱𝐞𝐜𝐮𝐭𝐢𝐯𝐞 𝐂𝐨𝐦𝐦𝐢𝐭𝐭𝐞𝐞 𝐭𝐡𝐮 𝐫𝐞𝐩𝐨𝐫𝐭 𝐚 𝐭𝐚𝐫𝐥𝐚𝐧 𝐭𝐥𝐚𝐧𝐠𝐩𝐮𝐢 𝐭𝐞 :

1. Council of Churches In Mizoram (CCM) inkhawmpui BCM Venglai kohhran, Lunglei-a nghah a nih tur tarlan a ni.

2. 𝐏𝐚𝐬𝐭𝐨𝐫 𝐁𝐢𝐚𝐥 𝐭𝐡𝐚𝐫 𝐡𝐚𝐰𝐧 𝐥𝐞𝐡 𝐬𝐢𝐚𝐦 𝐫𝐞𝐦 𝐭𝐮𝐫 𝐭𝐞:

a) Haulawng East Pastor Bial (Bial thar hawn tur)

b) N. Chaltlang Bial (Bial thar hawn tur)

c) Chaltlang Pastor Bial (Bial thar hawn tur)

3. 𝐀𝐫𝐞𝐚 𝐁𝐩𝐭𝐢𝐬𝐭 𝐂𝐨𝐮𝐧𝐜𝐢𝐥 (𝐀𝐁𝐂) 𝐒𝐢𝐚𝐦 𝐫𝐞𝐦 𝐭𝐮𝐫 𝐭𝐮𝐫 𝐭𝐞:

a) Aizawl East ABC

b) Aizawl North ABC

4. Probationary Pastor, Minister atana Assembly-a nemngheh tur mi 9 leh pro Pastor nilo, Minister atana nemngheh tur mi 2 leh Pastor atana lak thar mi 5 te report a ni bawk.

5. 𝐑𝐞𝐜𝐨𝐠𝐧𝐢𝐭𝐢𝐨𝐧 𝐏𝐚𝐰𝐡𝐬𝐞𝐢 𝐝𝐢𝐥 𝟕 𝐫𝐞𝐦𝐭𝐢𝐡 𝐭𝐡𝐮:

a) NEXGEN

b) Foundation for Drug Free Society

c) Mizoram Students Evangelical Union (MSEU)

d) Union of Evangelical Student of India (UESI)

e) International Media Evangelical Ministries (IMEM)

f) Friends of Odisha

g) Gospel trumpet

6. Pastor Quarters Flat sak chungchang te, LPS leh Zonet Programme lei tih tawp chungchangte, MBMP president leh Senior Adviser pawmpui chungchang te, BCM tawngtai hruaina bu-a ruihhlo ngaite puala tawngtai ni dah thu Baptist English School (BES) Extension Ramthar atana Budget dilbelhna chungchang report ngaihthlak a nih bakah hnathar hawn dilna pawm a ni bawk.

Zirtawp ni (6 March, 2026) 𝐓𝐡𝐮𝐫𝐞𝐥 𝐭𝐥𝐚𝐧𝐠𝐩𝐮𝐢𝐭𝐞:

1. Tun tum agenda-ah hian hnathar hawn dilna leh Post ruak hnawhkhah dilna te chu pawm a ni. Kum 2019 Pay Commission rawtna BCM Assembly-in a lo pawm tawh Contract-a thawkte dah ngheh chungchangah mi 26 dah ngheh tura chhawp chhuah chu pawm a ni a. Heng bakah hian Dr. Rosy Lalhriatpuii Specialist chu Kum thum a thawh hnuah Confirm a ni ta bawk.

2. BCM hnuaia Institutions-te Target pek chungchangah Assembly executive Committee-in a lo rel tawh chu pawm a ni.

3. Lirthei hlui hralh leh a thar lei dilna pawh pawm a ni.

4. 𝐂𝐨𝐮𝐫s𝐞 𝐭𝐡𝐚𝐫 𝐡𝐚𝐰𝐧 𝐫𝐚𝐰𝐭𝐧𝐚 :

a) Diploma in Christian Education

b) Diploma in Clinical Pastoral Counselling (DCPC) chu pawm a ni.

5. Ruihhlo nghei tum centre atanga chhuak enkawl na tha an dawn theih nan Half way home din.

6. Oportunity Shop (Thrift Store) Thawmhna / hmanraw hlui tlawm taka zawrhna Lunglei khaw laili deuhah din nise tih chu pawm a ni.

7. 𝐓𝐡𝐚𝐰𝐡 𝐡𝐨𝐧𝐚 𝐩𝐚𝐰𝐡𝐬𝐞𝐢 𝐥𝐞𝐡 𝐭𝐡𝐚𝐰𝐡𝐩𝐮𝐢 𝐚𝐭𝐚𝐧𝐚 𝐬𝐚𝐰𝐦𝐧𝐚 :

a) Mising Baptist Association (MBA) nen hun rei tak atanga kan thawh hona chu pawhsei leh nise tih a ni. Tunah hian BCM Missionary 3 leh native worker BCM sponsor mi 10 an thawk mek a ni.

b) Apatani Baptist Association (ABA) te, Adi Baptist Union (ABU) te Galo Baptist Union (GBU) te leh Baptist Missionary Society-te nen thawhhona chu pawm a ni.

8. Baptist English School (BES) Serkawn sawn tih chu pawm a ni.

9. Inneih hau tak lo zawnga buatsaih tih chu kohran dana inneihna chu mitinin an tlin theih nan a hautak lo zawnga buatsaih tur a ni. ( Inneih chungchanga inkaihhruaina leh thurawn dang eng emaw zat a awm bawk)

10. Politics-a inhmangte laka BCM –in beiseina a neih dan chungchangah Administrative-in lo en nawn se, Assembly Executive Committee-ah thlen leh nise tih a ni.

𝐁𝐂𝐌 𝐀𝐬𝐬𝐞𝐦𝐛𝐥𝐲 𝐜𝐡𝐮𝐚𝐧 𝐡𝐞𝐧𝐠 𝐚 𝐡𝐧𝐮𝐚𝐢𝐚 𝐭𝐡𝐮𝐫𝐞𝐥𝐭𝐞 𝐡𝐢 𝐚 𝐩𝐚𝐰𝐦:

1. BCM- in rawngbawlna zau zawk a neihna turin Sri Lanka-a Missionary tirh.

2. Hlemhletna (Corruption) dona kawnga chak zawka hmalak.

3. Baptist Higher Secondary School Hnahthial-ah din.

4. BCM-in Pathian thuzirna In kan neih AICS hmasawn zelna tura chak zawka hmalak.

5. BCM-in Certificate kan neih (Inneih, Nauhlan, Baptistma) re-issue leh original hriat hranna atan Certificate-a coding siam.

6. Mizoram Baptist kohhran tawngtai hruaina bu-ah ‘Krista tana tuartute tan’ tih leh ‘Ruihhlo ngaite leh a zuartute tan’ tih dah belh.

7. BCM Missionary leh a ram mi thawktute rawngbawlna avanga Court case neite tanpui dan Provision siam.

8. BCM pum huapa ram tana awmni khama tawngtai ni hman.

9. Pastoral Ministry Department hmalakna leh kalpui mek KOHHRAN lian ten kohhran harsa zawkte enkawl chhunzawm.

10. BCM Old Age Home din rawtna chu zirchianna neih a, Assembly Executive Committee-ah thlen.

11. Baptist Mission School Lungpuk Class VIII thlenga upgrade

12. BCM hmalak mekna ruihhlo do Kum 2026-2027 a chhunzawm.

13. Kohhran Upa active service atanga chawlte (Retire) Pathianni zing inkhawma in ang tlanga thlahna hun hman.

14. BCM office-a Artificial Intelligence (AI) hman tangkai.

15. Baptist English School tualchhung leh Pastor Bial hrang hrangin an dinte, mumal zawka kuahkhawm leh enkawl a nih theih nana hmalak.

16. Siliguri-a Missionary Quarters tur flat lei.

17. 𝐊𝐮𝐦 𝟐𝟎𝟐𝟔-𝟐𝟎𝟐𝟕 𝐁𝐮𝐝𝐠𝐞𝐭 𝐄𝐬𝐭𝐢𝐦𝐚𝐭𝐞:

2026-2027 Budget Pum pui 2026-2027 = 14364.95 Lakhs

Church Contribution = 9688.85 Lakhs

Department Contribution = 4676.10 Lakhs