PWD Minister leh Sports Minister-ten Durtlang North Multipurpose Indoor Hall hawnna hun hmanpui

Hnahthial Post | March 7, 2026, Aizawl: Vawiin khan Public Works Department (PWD) Minister Pu Vanlalhlana, Aizawl North-1 bialtu MLA ni bawk chuan Durtlang North-a Multipurpose Indoor Hall sak thar hawnna chu khuallian niin a hmanpui a. Sports & Youth Services (S&YS) Department Minister Pu Lalnghinglova Hmar chu khualzahawm niin, S&YS Department Commissioner & Secretary Pu V. Lalsangliana chuan hun a kaihruai a. He hall hawnna inkhawmah hian South Tuipui bialtu MLA Pu Jeje Lalpekhlua, Lunglei North bialtu MLA Pu V. Malsawmtluanga leh Hrangturzo bialtu MLA Pu Lalmuanpuia Punte-te an tel a ni.

Khuallian Pu Vanlalhlana chuan a bial chhunga Multipurpose Indoor Hall an neih theihna tura Sports & Youth Services Minister leh Department-a thawktute hmalakna chu fakawm a tih thu a sawi a. Thalaite tan sawrkar inpekna leh talent nei thate chher chhuah a tumna a lantir a ni tih sawiin, he Hall hi Mizo thalaite international leh national level inelna a tel phak khawpa chhertu a nih theih nan duhsakna a hlan a. Hall panna kawng pawh siamthat a nih dawn thu a sawi.

Khuallian chuan thu sawi chhunzawmin, Mizo thalai tam tak ruihhlo bawihah an tang a, ruihhlo bawiha tang thalaite hian an mahni chauh ni lo, an chhungte, an veng, an khua leh ram pum tan harsatna an siam a, chuvang chuan ruihhlo do kawngah hian kan zavaia kan tan tlan a ngai hle a ni, a ti a. Infiamna (Sports) lama Mizo thalai tam zawk kan kaltir theih chuan ruihhlo bawiha an tan hma hian kawng tha zawk an zawh theih a beisei thu a sawi a. PWD Minister a nihna angin Aizawl leh Mizoram khaw hrang hranga kawngpui tha mipuiten an neih theihna tura hma latu, hnathawktu engineer, technical lam mi leh PWD hnuaia thawktu zawng zawngte chungah lawmthu a sawi bawk a ni.

Khualzahawm Pu Lalnghinglova Hmar chuan Hall tha tak satu Lushai Engineer-te hnenah lawmthu a sawi a, he hall hmangtu mipuiten neitu rilru pu-a fai taka an vawna, tha taka an enkawl a beisei thu a sawi a. Multipurpose tih hming pu zo-a he hall hi infiamna chi hrang hrang atan hman a nih ngei a duh thu leh national leh international level-a medal dawng pha infiammi chher chhuaktu a nih a duh thu a sawi a. Mizoram pum dapchhuaka thalaite talent hai chhuahna tura sawrkar hmalakna ‘Empowering Mizoram Sports’ chu hmang tangkai turin kalkhawmte a fuih a, naupangte talent haichhuah nan veng tinin an venga naupangte infiamna chi hrang hranga training pe turin zirtirtu (coach) a thlawnin an ko thei a ni tih a tarlang bawk.

Pu Jeje Lalpekhlua pawhin MLA leh inkhelmi a nih mai bakah Durtlang vengpa a nihna angin thu sawiin, inkhel mite tan hmunhma tha siamsak mai bakah naupan lai atanga zirtirna tha pek a pawimawh thu a sawi a. Sawrkarin infiamna lama hmasawnna ruhrel (infrastructure) mipui tam thei ang berin an chhawr theihna tur hmuna an siam zel chu lawmawm a tih thu a sawi bawk.

Mizoram State Sports Council Secretary Pu Henry C. Lalrawnkima chuan technical report a pe a. Durtlang North-a Multipurpose Indoor Hall hi Ministry of Youth Affairs & Sports hnuaia Khelo India Scheme hnuaia sak a ni a, a project cost hi nuai 450 a ni. November 21, 2023 khan Administrative Approval hmuh a ni a, a sakna hmun tur chungchangah Durtlang North Local Council-te nen indawr niin, khawtlang leh sports hmasawnna atan tiin phal takin Mizoram State Sports Council kutah Land Lease an hlan a. Hnathawktu atan Tender chhuah a nih hnuah, Lushai Engineers, Ramhlun, Aizawl chu thlan a ni a, March ni 18, 2024-ah hnathawh bul tan niin, February ni 23, 2026 khan zawh fel a ni.

He Multipurpose Indoor Hall hi a dung lam metre 46 niin, a vang zawng metre 20 a ni a, a Hall san zawng hi metre 9 nii, a chung sang lai ber hi metre 12 a ni. A chung khuh nan Steel Structure Roof Truss leh DYNA Roof hman a ni a. A sir tawn tawnah hian mi 200 vel thut theihna tur Spectator Gallery leh VIP Gallery siam a ni a, he Gallery hnuaiah hian players’ changing room 2, Official room, VIP Rest Room, Medical Room leh Store-room bakah mipate tan toilet pathum (3) leh urinal pali (4) dah niin, hmeichhe tan toilet pali (4) siam a ni bawk.

He Multipurpose Indoor Hall hi Indoor Sports Discipline hrang hrangte hman theih turin a chhuat pawh 7 mm-a chhah PVC Vinyl Sports Flooring phah chhuah vek a ni a. Volleyball Net pole leh Net dah tel a nih bakah, building hmalam tualzawl pawh PCC Flooring-a siam nghal a ni. He Hall enkawl zui tur hian Management Board din a ni.

Vawiin Hall hawnna inkhawmah hian Durtlang North Local Council, YMA, MUP leh MHIP hotute bakah Mizoram Sports Council member-te an tel a ni.