Larsap-in National Level Camp-a tel NCC Cadet-te lawmpuina buatsaih

Hnahthial Post | March 3, 2026, Aizawl: Mizoram Larsap General (Dr) Vijay Kumar Singh, PVSM, AVSM, YSM (Retd) chuan vawiin chawhma khan Mizoram atanga National Level Camp-a tel National Cadet Corps (NCC) cadet 19 te lawmpuina hun Durbar Hall, Lok Bhavan-ah a buatsaih. He hun hi Chief Minister Pu Lalduhoma, Sports & Youth Services Minister Pu Lalnghinglova Hmar leh Lt Col Clement Lalhmingthanga, MLA te'n an telpui a ni.

NCC Cadet-te lawmpuina programme-ah hian Larsap General (Dr) Vijay Kumar Singh chuan Mizoram NCC indin thar zelna kawngah hmasawnna thar a hmu chu phurawm a tih thu a sawi a. NCC Group HQ Aizawl hawn thar a ni leh hemi hnuaia Mizoram NCC Unit zawng zawngte tha taka kalpui a ni chu lawmawm a tih thu sawiin, hemi avang hian thalai tam zawkin NCC an zawm belh ngei a beisei thu a sawi a. India ram NCC cadet sang chuang zingah fiahna hautak tak paltlanga national level camp-a tel thei cadet 19 lai Mizoramin a nei chu chhuanawm tiin, hei hian cadet-te taimakna, inthunun theihna leh tumruhna nasat zia a lantir a, fak pawh an phu hle a ni, a ti bawk.

Larsap chuan amah ngei pawhin kum 1965 ah NCC Advanced Leadership Camp hmasa ber a lo chhim tawh tih sawiin, camp leh Kartavya Path vela chet tlatnate chu dam chhunga an hriat reng dawn thu leh, hruaitu tha ni tura a puih dawn thu a sawi a. NCC Group HQ Aizawl hnuaiah 3rd wing ni turin Naval Wing din a duh thu sawiin, a hlawhtlin thuai theih nan Group Commander chu chak taka hma la turin a chah a. NCC cadet-te hlawhtlinna phena mi tangkai nu leh pa, zirtirtu leh NCC officer-te kaihhruaina leh fuihnate chu fakawm a tih thu sawiin, NCC cadet-te chu duh tawk mai lova tun aia nasa zawka tan la turin a fuih a. Mahni inthununna, rinawmna, tlawmngaihnate chhawmnung chung zela ram tana theihtawp chhuah tum turin a fuih bawk.

He hunah hian Larsap leh Chief Minister-te hian National Level Camp-a tel NCC Cadet-te hnenah chawimawina thilpek an hlan bakah an tawnhriatte zawtin an kawm bawk.

Tunhnai NCC national level camp neih zawh takah khan Mizoram atangin NCC cadet 19 an tel a. 20 Mizo Bn. NCC atangin cadet 2, 1 Mizo Bn. NCC atangin cadet 1, 1 Mizo Air Sqn NCC atangin cadet 8 leh 2 Mizo Bn. NCC atangin cadet 8 te an tel a. Heng zinga cadet 4 te hi Republic Day Camp (RDC) ah telin, cadet 1 All India Thal Sainik Camp (AITSC) ah a tel a, cadet 5 te All India Vayu Sainik Camp (AIVSC), Air Force NCC central Camp-ah telin, cadet 9 te Special National Integration Camp (SNIC) ah an tel a ni.

He hunah hian Brig GS Arora, Group Commander, NCC Mizoram, sawm bik official dangte, NCC Officer-te leh Cadet tawiawmtu an chhungte an tel a ni.