Hnahthial Post | March 13, 2026, Hnahthial: 'Zo nun Ze mawi Inremna' tih thupui nei Chapchar Kut, 2026 chu vawiin khan Hnahthialah pawh Pasaltha Mual, Denlung-ah ropui taka hman a ni a. South Tuipui bialtu MLA, Pu Jeje Lalpekhlua chu Kut pa niin Pi K. Vanlalruati, District Bawrhsap chu Kut Thlengtu a ni.
Kut Pa, South Tuipui bialtu MLA, Pu Jeje Lalpekhlua chuan thu sawiin vawiina Mizo te kut ngaihhlut tak Chapchar Kut hmang theia kan awm hi a lawmawm a tiin a ngaihhlut thu a sawi a. Kumin kut thupui, 'Zo nun Ze mawi, Inremna' tih hi kan thinlungah kan vawn reng a tul thu sawiin Mizo te hi mi tha tak tak vek niin Mizo nih hi tinuamtu pakhat a nih thu a sawi a. Tlawmngai hnam, aia upa zah tu, mi harsa khaichhuak thin hnam kan nih thu sawiin vawiina kan kut thupui hi kan vawn nun reng a tul thu a sawi.
Hnahthial District pawhin hmasawnna nasa tak kan nei chho mek zel thu sawiin Sustainable Development Goals tehna hrang hrang a siamah India ram puma pakhatna dinhmun kan hauh thei te hi a hlut takzet thu a sawi a. Kut Pa chuan tun hnaiah Hnahthial District atangin MCS tling thar 2 bakah zirtirtu tha chawimawi tlak kan nei te hi a hlu hle a ni tiin MCS tling tur te, Zirtirtu tha ni tur te hian theih tawp an chhuah ang tih a chian thu a sawi a. Vawiina lo kalkhawm, a bik takin zirlaite leh naupang zawk te hian kan thiltihna kawng hrang hrangah theih tawp kan chhuah a tul a ni tih hre thar leh i la, Mizoram mai ni lo, India huapah pawh kan lang thei ngei ang a ti bawk.
He hunah Chapchar Organizing Chairman Pu HD. Lalpekmawia chuan inlawmna thu sawiin Kut thlengtu, District Bawhrsap, Pi K. Vanlalruati pawhin thu a sawi a. Zaipawl, mal zai leh hnam lam chi hrang hrang entirna neih niin Kut Nula, Kut Tlangval leh Kut Mipa Naupang leh Kut hmeichhe naupang thlan an ni bawk.
Chawhnu lam programme-ah Zai Kutpui hman niin ziami ten mipui an awi a ni.
Tags
News